Нывтæ, гравюрæтæ æмæ скульптурæтæ. Æвзонг нывгæнджыты равдыст байгом сывæллæтты республикон чиныгдоны. Нысангонд æрцыд сабиты чынгуыты къуырийæн. Йæ байгом кæныны фæдыл кадджын мадзалы уазджытæ систы культурæйы сгуыхт архайджытæ æм раззагдæр дæснытæ. Экспозицийæн аргъ скæнæн ис апрелы кæронмæ. Бæлвырддæр нæ дарддæры æрмæджы.
“Мæ дуне — кувæндон, уарзондзинад — мæ Хуыцау, æгас дуне Фыдыбæстæ мæнæн” — Ирыстоны алкӕмӕн дӕр зонгæ сты ацы ныхæстæ. Хетӕгкаты Къостайы ӕмдзӕвгӕйӕ скъуыддзаг Илья Игнатенкойӕн йӕ бон бацис кӕттагыл ирдӕй равдисын. Ӕвзонг нывгӕнӕг хуыздӕрыл нымайы аивадон пастель.
Хетæгкаты Къостайы сфæлдыстадæй скъуыддзæгтæй уæлдай ма Илья Игнатенко равдыстмæ бацæттæ кодта пластилинæй конд кардджын сылгоймаджы. Фæллой йыл кодта æртæ боны. Алы лыстæгдзинад дæр куыд æмбæлы, афтæ скодта. Кæлмæрзæнæй райдай, уæлæдарæс æмæ ма суанг нанайы цæсгомыл æнцъылдтæ дæр.
Экспозицийы – сывæллæтты аивæдты скъолайы ахуырдзауты 32 куысты. Курдиатджын фæсивæд сразæнгард сты литературон классикты сфæлдыстадæй – Александр Пушкины æмæ Хетæгкаты Къостайы. Архайдтой ма алы адæмты культурæ æмæ традицитæ равдисыныл. Алыхуызон здæхтытæ дисы фтауынц – цымыдисаг нывтæй зæрдæмæдзæугæ скульптурæты онг
Экспозици снысан кодтой сывæллæтты чиныджы æрвылазон къуырийæн. Кадджын мадзалы ма архайдтой сгуыхт нывгæнджытæ дæр. Культурæйы министры хæдивæг Рæмонты Маринæ фæнысан кодта, алы куысты хицæндзинад, раарфæ кодта сывæллæттæн.
Равдыст байгом кодтой сывæллæтты республикон чиныгдоны. 26-æм апрелы онг алкæй бон дæр у æвзонг нывгæнджыты сфæлдыстадимæ зонгæ кæнын. Уыимæ ма къухтæм ахорæнтæ райсгæйæ хи аивады бафæлварын дæр.
