31-æм январæй фæстæмæ Уæрæсейы цæрджытæн фадат ис паддзахадон лæггæдты порталы сæхи вакцинацимæ ныффыссынæн. Æнæниздзинад хъахъхъæнынады министрады мадзалæн сарӕзтой æппæт хъæугæ уавæртæ дæр. Нæ республикæйы дæр коронавирусы ныхмæ кæнынц вакцинаци.
Апрелы онг æй хъуамæ ацæуой 200 мин адæймаджы. Дзуаппдæттæг министрад куыд хъусын кæны, афтæмæй ныридæгæн республикæ райста 1242 комплекты «Гам-Ковид Вак». Æнхъæлмæ ма кæсынц ноджы 1200 дозæмæ. Вакцинаци скæнæн ис Дзæуджыхъæуы 3 поликлиникæйы. Прививкæ райсыны фадат ис районты цæрджытæн дæр. Кæй фæнды, уыдоны фæхæццæ кæндзысты Дзæуджыхъæумæ. Бафтаудзыстæм ма уый, ӕмӕ процедурæ у лæвар æмæ барвӕндон. Хи бафыссæн ис куыд колл-центрты æмæ медицинон куыстуæтты регистратурæты, афтæ Паддзахадон лæггæдты порталы дæр.
«Спутник V»-йы прививкæ скæнын æмбæлы, 18 фылдӕр кæуыл цæуы, уыдонæн. Фæлæ дохтыртæ куыд зæгъын, афтæмæй радон иртæстыты фæстæ вакцинæ скæнæн ис, 65 азæй фылдæр кæуыл цæуы, уыдонæн дæр. Æрмæст, æнæмæнг, хъæуы дохтырæй консультаци райсын, цæмæй æппæт лыстæг хъуыддæгтæ дæр нымад æрцæуой, уый тыххæй.