Бактеритӕ, тумак, сальмонеллӕ — пъæмидор кӕнӕ, зæгъæм, уырыдзыйы цы ‘мбӕхст ис, уый ничи зоны. Хатгай тӕрхӕджытыл бирӕ низтӕ æрæмбырд вæййы. Уымӕ гӕсгӕ бӕрӕг кӕнын хъӕуы хойрæгты хӕрзхъӕддзинад. Алагиры лабораторийы — раст поликлиникӕйы хуызӕн. “Пациенты” басгарынц ӕмӕ йын диагноз сæвæрынц, алы продуктæн дӕр — хицæн иртæст. Зӕгъӕм, халсартӕ ӕмӕ дыргъты бӕрӕг кӕнынц нитраттæ, сӕрмагонд гарз секундты фӕстӕ равдисы химикатты нымӕц.
99 миллиграммы — ӕмбæлгæ бӕрӕггӕнӕн, фӕткъуыты 250 онг дæр хæццæ кæны, къабускайы та йæ бон у суанг 900 уæвын. Алы продуктӕн дӕр йæ нормӕ — алыхуызон. Зæгъгæ, зæрдæ иу дыргъ кæнæ халсармæ фехсайдта, уæд æнæхъæн парти ӕрвыст цӕуы иртæстытæм. Фӕлӕ уый дæр алкæд нæ.
Дарддæр рады — ӕйчытӕ, бӕрӕг сæ кӕнынц хуызмæ ӕмӕ тумак – хӕцгӕ низмæ гæсгæ. Овоскопы руаджы цъары бынмӕ бакӕсӕн ис айк ӕнӕ сӕтгӕйӕ. Ацы парти – хорз рауад, фӕлӕ Гуытъиаты Зӕлинӕ куыд зæгъы, афтӕмӕй дарддæр дæр къæрцхъус уæвын хъæуы. Уый ныр 30 азы кусы ам, дзуры экспертизӕйы хӕрзхъӕддзинадӕй, гӕнӕн ис, ӕмӕ аразгӕ уа адæймаджы ӕнӕниздзинад ӕмӕ суанг суанг йæ цард дӕр.
Лабораторийы уылты цӕуынц Алагиры базары ӕппӕт продукттӕ дӕр. Æрвылрайсом специалисттӕ ӕрзилынц тӕрхӕджытыл. Дзидза, нæлхæ, кӕсаг, халсартӕ, дыргътӕ — æлхæнæджы чыргъæдмæ бахауынц ӕрмӕст хуыздӕр хуызӕгтӕ. Ам куыд зæгъынц, уымæ гæсгæ фæткхæлдтытæ арӕх не ‘рцӕуы, фылдӕр сæмбæлынц кондады брак кӕнӕ ӕвӕрыны нæбæззон уавӕртыл. Уӕйгӕнджытӕ архайынц домæнтæ ӕххӕст кӕныныл.
Ныр 50 азӕй фылдӕр Алагиры лаборатори йӕ хъус дары хойрӕгты хӕрзхъӕддзинадмæ. Бынӕттон специалистты къӕрцхъусдзинады фӕрцы горӕты сӕдӕгай цӕрджытӕн сӕ бон у хӕринаг ӕлхӕнын, æнӕниздзинадӕн нӕ тӕрсгӕйӕ.
