Абон Зилгæйы кадджын мадзалы рæстæг байгом кодтой Хетæгкаты Къостайы цыртдзæвæн. Сцæттæ Къостайы 160 азы юбилеймæ. Уыимæ ма ацы аз Зилгæйы хъæуыл сæххæст 205 азы дæр. Цæттæгæнæн мадзæлттыл бирæ адæм бацархайдтой. Бæлвырддæр хабæрттæ уын радзурдзæн нæ уацхæссæг Къутæрты Аидæ.
Хетæгкаты Къостайы сфæлдыстад Лалыты Левæн уæлдай зынаргъ у. Йæ хъуыдымæ гæсгæ, хъуамæ ахæм зындгонд адæймаджы ном рох ма уа. Æмæ йæ цæмæй нæ кæстæртæ зоной, уый тыххæй йæ хæсыл нымайы, фидæны æнустæм фæлтæрæй фæлтæрмæ Леуаны фырты ном зæрдæты цæра.
Зилгæйы хъæуыл тагъд сæххæст уыдзæн 205 азы. Уыимæ Лалыты Левæн тынг æхсызгон у, Къостайы 160 азы юбилеимæ иу азмæ кæй æрцыдысты. Уый руаджы йын фадат фæци балæггад кæнын Зилгæйы адæмæн, æмæ сын сæ культурæйы хæдзары кæрты зындгонд фыссæджы цыртдзæвæн сæвæрдта. Нæлгоймаг иу æмæ дыууæ хатты нæ бацархайдта, ацы ахсджиаг хъуыддагыл. Уый размæ ма Къостайы номыл сæвæрдта 3 цыртдзæвæны.
Лев куыд зæгъы, афтæмæй ацы хъуыддаг раппæлыны тыххæй нæ кæны. Йæ сæйраг нысан у адæмæн пайда хæссын, цæмæй дзы фидæны йæ кæстæртæ сæ сæртæ бæрзонд хæссой. Æмæ æрмæст Лев нæ хъуыды кæны фидæныл ахæм хуызы. Левимæ иузæрдионæй архайынц æндæр адæм дæр. Кцойты Герман æрæджы Беслæныхъæуы сæвæрдта бюст. Куыд нын радзардта, афтæмæй рагæй фæнд кодта нæ фыссæджы номыл исты хорздзинад ракæнын.
Ацы бæрæгбонмæ æрбамбæлыдысты кадджын уазджытæ Стъараполæй. Уыдонæн тынг æхсызгон уыд, Лалыты Левы сконд цыртдзæвæнæй разыйæ баззадысты. Зилгæйы адæм дæр æхсызгон уыд уазджытимæ фембæлд æмæ сæ сбуц кодтой лæвæрттæй. Уазджытæ ма бакастысты æмдзæвгæтæ дæр. Кæрæдзийæн арфæцы ныхæстæ ракодтой. Уæдæ хъæуы цæрджытæ дæр ныр сæрыстыр уыдзысты, сæ хъæуы ахæм цыртдзæвæн кæй сæвæрдтой, уымæй.
Тагъд рæстæджы Зилгæйы хæдзары культурæйы кæрты Къостайы цыртдзæвæны раз сараздзысты фонтан, æмæ ма уымæй уæлдай бандæттæ дæр. Кцойты Геманы хъæппæрисæй та ныссадзысты бæлæстæ.
Къутæрты Аидæ
