Æнæзакъон бырондæтты фарста ныр дæр ма ахсджиаг у. Цæлыччы бырондон бынæттон разæнгард фæсивæд цалдæр мæй размæ рабæрæг кодтой. Сæ хъаст æмæ йæ аиуварс кæныны тыххæй курдиат бахастой Æппæтуæрæсеон адæмон фронты регионалон штабмæ.
Афтæмæй бырондон фæбæрæг кодтой фронты картæйыл. Цалдæр боны размæ хъæуы цы донивылд æрцыд, уый уавæр фæфыддæр кодта. Адæм сæ кæртытæ, цæхæрадæттæ сыгъдæг кæнынц æмæ цы цъыф, чъизи æмæ хауæццæгтæ сисынц, уый бырондонмæ ласынц. Цæлыччы администрацийы куыд æмбарын кæнынц, афтæмæй сæхи хъарутæй сæ бон фарста алыг кæнын нæу.
Фæткмæ гæсгæ быронласæн машинæйæн фидынæн сæм æхца нæй.
Хуыздæр уавæры не сты Бруты цæрджытæ дæр. Пластик æмæ авджы сæстытæ, целлофан дзæкъултæ фосы хизæнтыл апырх сты. Ацы бырондон дæр бахастой сæрмагонд картæмæ. Фæлæ та рæстæгæй-рæстæгмæ ногæй фæзыны. Æппæтуæрæсеон адæмон фронты регионалон штабы экспертты хъуыдымæ гæсгæ, цæмæй раппæлой, уый дæр ис. Зæгъæм, 49 бырондонæй 25 ссыгъдæг кодтой. Ныр фронты сайты картæйыл сырхæй ахуырст бынæттæ фæкъаддæр сты. Регионалон штабы разамонæджы ныхæстæм гæсгæ, фылдæр куыст бакæнынц районты хъæппæрисджын æмæ разæнгард адæм. Уæдмæ та уал республикæйы агурынц бырæттыкуыстгæнæг регионалон операторы. Фидæны нысан кæнынц республикæйы дыууæ полигоны саразын.
