Организаци “Топаз”-ыл афæдз дæр нæма цæуы. Фæлæ бархионтæ ныридæгæн баххуыс кодтой сæрмагонд æфсæддон операцийы архайджыты 60 бинонтæн. Сæ девиз “Своих не бросаем”, зæгъгæ æххæстæй æвдисы сæ ахастдзинад. Разамонæг Багаты Эрик нæ дызæрдыг кæны – æхсæнадон змæлды фæрцы хæстонтæ зонынц – сæ хæстæджытæ иунæг не ‘сты æмæ сыл чи баузæла, уый ис.
Сæ хъæппæрисимæ фæсидтысты республикæйы сæргълæууæгмæ. Афтæ равзæрд “Топаз”. Бархионтæ кæнынц алыхуызон æххуыс. Зæгъæм, æрæджы бафснæйдтой нæ хæстоны бинонты хæдзары кæрт æмæ цæхæрадон. Ныртæккæ уый тохы бынаты ис, фæлæ йæ бинойнаг æмæ цоты фарсмæ æххуыс хъæуы. Активисттæ бæлæстæ акалдтой, раластой бырон, сарæзтой быру. Иу ныхасæй, нæлгоймаджы куыстытæ бакодтой.
Организаци æмгуыст кæны фонд “Фыдæбæстæ хъахъхъæнджытæ”-имæ. Специалисттæ исынц адæмы курдиæттæ æмæ сæ æрвитынц “Топаз”-мæ. Архайджытæ арæх сæмбæлынц сæрмагонд æфсæддон операцийы зонæмæ. Фæныхас кæнынц хæстонтимæ, бынаты базонынц цавæр æххуыс сæ хъæуы, кæнæ та фехъусынц бузныджы ныхæстæ. “Топаз”-ы хай “Ирон фæсивæд” та кусы царды зын уавæрты бахауæг сывæллæттимæ. Æппынæдзух феххуыс кæнынц бархионтæн æмæ афтæмæй сæ фæдыл раст, патриотон хæзнатæ амонынц.
“Топаз”-мæ ма æрбацæуынц хистæркъласонтæ, уыдоны дæр фæнды нæ хæстонтæн баххуыс кæнын. Æмæ уый æхсызгон у. Организаци адæм æнгом кæны иумæйаг архайдмæ. Райгуырæн бæстæ бахъахъхъæныны тыххæй йæ бинонты чи ныууагъта уыдоны фарсмæ балæууы.
