Уæвгæ, скъолаты ма сывæллæтты кæд исты `гъдауæй бахъхъæнæн ис, уæд сæ бинонты `хсæн цытæ цæуы, уый зын зæгъæн у. Абон æгас республикæ фегуыппæг ис, интернеты адæм цы видеоæрмæг апарахат кодтой, уымæй. Цæвиттон, кæд искуы æнахъом тамакодымæг никуы федтат, уæд æрбакæсут.
Ацы кадртæ кæм, кæд æмæ чи систа, уый бæрæг нæу. Фæлæ сæ зæрдæ кæй ныккæрзы, ууыл дызæрдыг ничи кæны. Фæскадры цы хистæртæ уыдис, уыдон бавдæлдысты æмæ сывæллоны къухы тамако ныссагътой. Сабийыл йæ асмæ гæсгæ æртæ азы дæр нæма цæуы, æвæццæгæн. Фæлæ куыд арæхстджынæй пъæртт кæны, уый бирæ цæуылдæрты дзурæг у. Фыццаг хатт ын нæу, æнæмæнг. Хуыфгæ дзы нæ кæны, уый фаг нæу, фæлæ ма йæ цæсгом дæр уæлдай æнцъылд нæ фæци. Æцæг лæгау йе `ртхутæг æрцæгъдынмæ дæр уæдæ хорз арæхсы. Уæдæ йæ æнаккаг ныхæстæ кæныныл дæр хорз сахуыр кодтой. Зæды хуызæн лæппуйæ йæ бинонтæ афонæй раздæр къулбадæг цæмæн аразынц, уый та рæстуд адæймаджы сæр нæ ахсы. Йе `нæниздзинад ын цæмæн къахыр кæнынц, уымæн дæр хæйрæг – йæ зонæг. Раст Къостайы загъдау «цы уыдзæн нæ фидæн, нæ фæстаг» – афтæ рауад. Диссаг куыд нæу, фæлæ не сфæлдыстадон къордæн абон бантыст, сывæллоны къухы тамако чи ныссагъта, уыцы адæймагимæ аныхас кæнын. Цы зæгъы, уымæ ма байхъусут.
Республикæйы прокуратурæ ацы хабармæ æвæстиатæй йæ хъус æрдардта. Æмæ куыннæ! Хæлд æрцыдысты цалдæр закъоны. Нымады у, социалон хызты чысыл тамакодымæгимæ видео цы комментаритæ райста, уый дæр. Ацы сахатмæ нæ къухы бафтыд прокуратурæйы ахаст бамбарын. Чысыл раздæр нæм æрбарвыстой пресс-службæйы хъусынгæнинаг. Табуафси!
Прокуратурæ йе `ргом аздахдзæн, сабийæн тамако чи дымын кодта, уыдонмæ. Ахæм хæс йæ дæлбар кусджытæн радта республикæйы прокурор Владимир Векшин. Барад æххæст кæнынмæ цæстдарджытæ хъуамæ сбæрæг кæной, æнахъом сабийы цард æмæ æнæниздзинад хъахъхъæныны тыххæй закъонад куыд æххæстгонд цæуы, уый. Хъуамæ æркæсой бинонты социалон æгъдауæй æххæстдзинадмæ дæр. Уыйфæстæ прокуратурæ раиртасдзæн, барадон æгъдауæй сывæллоны ныййарджытæ сæ хæстæм цы цæстæй кæсынц, уый. Барады кусджытæ ма аргъ скæндзысты социалон службæты куыстæн, афойнадыл тæссаг уавæры уæвæг сывæллæтты кæй нæ раиртæстой, уымæн.
