Республикæйы алы районты цы бырондæттæ æвзæрынц æмæ уыдонæй исты заводтæ куы кусиккой, уæд, æвæццæгæн, республикæйы æфтиæгтæ бирæ фылдæр уаиккой. Фæлæ арæх æвдисæн куыд вæййæм, афтæмæй бырæттæ бирæ, æфснайджытæ – иу-цалдæр. Иудзырдæй, æрдзы чъизидзинад та фылдæрæй-фылдæр кæны. Уавæр зонгæйæ уæлдай æхсызгон у, не `хсæн сыгъдæгуарзаг æмæ æнæзивæг фæсивæд кæй ис, уый. Абон уæ нæ программæйы цы лæппуимæ базонгæ кæндзыстæм, уый йæхицæн хæсыл банымадта æрдзы сыгъдæгдзинадыл бакусын.
Пластик, хъæбæр гæххæт æмæ авг – Камбилеевкæйы цæугæдоны былгæрæттæ быронæй байдзаг сты. Уавæрмæ йæ цæст æрдардта Дачныйы цæрджытæй иу, Рашид Яндиев. Спортуарзаг лæппу алы райсом дæр дугъ фæкæны. Иу ахæм райсом йæ фæндаг акодта доныбылтыл æмæ дзы быроны обæуттæ куы федта, уæд йæ зæрдæ ныррызт. Хæдзары бырæттæй уæлдай ма адæм ардæм раласынц сæ арæзтадон бырæттæ. Æмæ кæд доныбыл фæлладуадзæн бынатыл нымад хъуамæ уа, уæд бынæттон цæрджытæн сси быронæмбырдгæнæн.
Рашид Яндиев: «Ахæм хъуыдымæ æрцыдтæн æмæ мæхи тыхтæй бафснайон ацы фæзуат. Иу къуыримæ æрæмбырд кодтон 25 голладжы. Куыд фæстæдæр æй бамбæрстон иунæгæй йæ ссыгъдæг кæнын мæ бон кæй нæ уыдзæн, уый. Алы къуырисæры ам фæцæуы быронласæн трактор. Æз хауæццæгтæ голлæгты сæмбырд кодтон æмæ сæ ныууагътон фæндаджы цур. Трактор сæ аласта. Кæй зæгъын æй хъæуы, фæсыгъдæгдæр. Фæлæ та кæсут, хъуыддаг нæ ивы. Адæм сæ бырон куыд калдтой, афтæ йæ дарддæр калынц. Мæ рæстæг æмæ мæ куыст – дон хиды бынты кæлæгау».
Иунæгæй йæ бон кæй ницы у, уый бамбаргæйæ Рашид Яндиев сфæнд кодта ацы бырондон Æппæуæрæсеон Адæмон фронты картæмæ бахæссын. Афтæмæй æхсæнадон куысты раззагдæр архайджытæ базыдтой ног бакусинаг фарстайыл. Уыцы-иу рæстæг курдиаæттæ ныффыстой бæлвырд ведомствæтæм.
Цалынмæ иутæ æнтысджынæй нæ зæххы къори чъизи кæнынц, уæдмæ йæ иннæтæ сыгъдæгзæрдæйæ æфснайынц æмæ æххуыс кæнынц æрдзхъахъхъæныны хъуыддаджы. Уымæн бирæ дæр нæ хъæуы. Дæ алыварс сыгъдæг дарын. Кæ æмæ искуы тынг чъизи у, уæд йæ иумæйаг тыхтæй бафснайын. Тынг егъау бырондæтты тыххæй та фехъусын кæнын Уæрæсейы Адæмон фронты уæнгтæн йæ къамтæ та йын сайтмæ бахæссын. Уый фæстæ æхсæнадон кусджытæ сбæлвырд кæндзысты информаци æмæ æмбæлгæ мадзæлттæ сараздзысты.
Пелиты Сабинæ
