100 азы нæ бæстæйы арæнтæ хъахъхъæнынц Уæрæсейы арæнхъахъхъæнæг æфсæдтæ. Абон бæрæг кæнынц сæ юбилей. Алы бон дæр æнæрынцойæ кæсынц цæрджыты æдасдзинад æмæ бæстæйы арæнтæм. Уæрæсейы кæрæттæ та æрæнцадысты Цæгат Ирыстоныл дæр. Æрвылбон арæнты сæрты ахизы мин адæймаджы бæрц. Уый тыххæй арæнхъахъхъæнджытæн иу уысм дæр æнæ къæрцхъусæй уæвæн нæй. Нæ уацхæсджытæ æнæхъæн бон фесты арæнхъахъхъæнджытимæ æмæ сæхæдæг бамбæрстой, ацы службæ æнцон кæй нæу, уый.
Фæдисы сигнал æмæ иу усммæ хæцæнгæрзтæ къухы. Оперативон къорд цæсты фæныкъуылдмæ цæттæ у. Æрымысгæ цаумæ гæсгæ, паддзахадон арæнтæм хæстæг рабæрæг кодтой закъонхалджыты. Сæ агурынмæ ацыдысты 5 арæнхъахъхъæнæджы сæ куыдз Вулканимæ. Уæрæсе æмæ Гуырдзыстоны хсæн арæн ацы ран цæуы цъитийыл – 40 километры бæрзæндыл. Мæнг террористтæ ссардтой сусæг фæндæгтæ æмæ æнæзакъонæй ахызтысты арæнты сæрты. Куыдз уайтагъд закъонхалджыты фæдыл араст. Цалдæр километры ацæугæйæ, арæнхъахъхъæнджытæ ссардтой террористты æмхæсæн бынат. Къорды командыгæнæджы амынддзинæдтæм æххæстгæнгæйæ, æфсæддонтæ закъонхъалджыты æдзæттæйæ баййæфтой æмæ сæ æрцахстой. Цалдæры дзы амардтой, иуы та ахсгæ æркодтой. Æрымысгæ цаумæ гæсгæ операци æнтыстджынæй æххæстгонд æрцыд.
Арæнхъахъхъæнæг: «Æфсæддонты цæттæгæнæн мадзæлтты рæстæг арæзт æрцыдысты знæгтæ рабæрæг кæныны æмæ сæ сусæг бынæттæ ссарыны мадзæлттæ. Арæнхъахъхъæнджытæ сæ хъуамæ æрцахсой, вæййы афтæ æмæ сæ хæстой операцийы рæстæг маргæ дæр акæнынц. Ахуырты рæстæг бакуыстам арæнхъахъхъæнджыты къорды командæгæнæджы амынддзинæдтæ æмæ хæслæвæрдтæ рæвдз æмæ æнæ къуылымпыйæ æххæстгонд куыд цæуый, ууыл. Стæй къорды уæгтæ кæрæдзимæ кусыныл куыд ахуыр кæной».
Фыдыбæстæйы арæнтæ хъахъхъæнын æнцон хæс нæу. Фæлæ арæнхъахъхъæнджытæ сæ ныфс кæмæй хæссой, уый сын ис. Арæнтæм хæстæг цæрынц сæ бинонтимæ. Уымæн сын арæзт æрцыдысты æппæт фадæттæ. Дзæхаты Давид арæнты 6 азы службæ кæны. Йæ бинойнаг æмæ сæ 5-мæйдзыд чызг дæр йемæ цæрынц.
Арæнхъахъхъæнæджы бинойнаг: «Райсомæй нæ фыды афæндараст кæнæм. Йæ кусæн дзаумæттæ йын æрцæттæ кæнæм, цæмæй сыгъдæг æмæ аив уа. Аходæн ын æрцæттæ кæнæм, æмæ йын ууыл фæндараст фæзæгъæм. Фæлæ ма гæнæн ис, æмæ сихорæй дæр фембæлæм. Сывæллонимæ æдтæмæ куы рацæуæм, уæд ыл иуæй-иу хатт фембæлæм заставæйы. Гæнæн ын куыд вæййы, уæд йæ чызгимæ дæр ахъазы. Æхсæвæр куы скæнæм, уæд дарддæр нæ чызджы куыст фæкæнæм».
Уæрæсейы паддзахадон арæны иумæйаг дæргъ Цæгат Ирыстоны у 60 мин километрæй фылдæр. Йæ алы усм дæр арæнхъахъхъæнджытæ лæмбынæг хъахъхъæнынц.
