«Пырх фæндæгты картæ», зæгъгæ, сæрмагонд проекты фæлгæты Æппæтуæрæсеон адæмон фронты минæвæрттæ дарддæр бæрæг кæнынц республикæйы фæндæгты уавæр. Картæмæ хъусынгæнинаг бахæссыны фадат ис алы цæрæгæн дæр. Æппæт хъæндзинæдтæ дæр фронты уæнгтæ бахæццæ кæнынц бæрнон ведомствæтæм.
Реданты поселочы Сосновая, зæгъгæ, уынджы техникæ иу ран нæ лæууы. Кусджытæ ног кæнынц фæндаг. Æппæтуæрæсеон адæмон фронты пырх фæндæгты картæйы ацы уынг фæнысан кодтой фыццаг. Ныр цæрджытæ зæрдиагæй æнхъæлмæ кæсынц, куыстытæ кæд фæуыдзысты, уымæ.
Колыты Аксойы номыл уынджы ног фæндагæй хæдтулгæты хицæуттæ разы сты. Фæлæ дзы æппæтуæрæсеон адæмон фронты уæнгтæ уæддæр хъæндзинæдтæ ссардтой. Ацы фæндадаг хæрз æрæджы сног кодтой. Скъоламæ æмæ сывæллæтты рæвдауæндонмæ хæстæг фистæгцæуджытæн
фæндаджы сæрты ахизынæн сæрмагонд бынат нысангонд не рцыд.
Цæмæй фæндаджы сæрты ахизай, уый тыххæй хъуамæ уай къæрцхъус. Сырхгвардионты номыл уынджы фистæгцæуджытæн бынат хæстæгдæр рæстæг нæ фæзындзæн. Ацы фæндаг цалцæг кодтой 10 азы размæ, уæд дыуæ хайыл дихгонд не рыд. Фæндаг æнæхъæнæй гом кæй нæу, уымæ гæсгæ æдасдзинады домæнтæн дзуапп нæ дæтты. Тæссаг дзы у фæндаггон фыдбылызтæй.
Æхсæнадон архайджытæ сæ хатдзæгтæ фæхæццæ кæндзысты Дзæуджыхъæуы муниципалитетмæ. Адæмон фронты уæнгтæ ма иу хатт адæмы зæрдыл лæууынц, пырх фæндаджы тыххæй хъусынгæнинг æрбарвитын у алкæйы бон дæр.
Уазиты Зæлинæ
