Æрдзы сыгъдæгдзинадыл ныхас

Сывæллæтты бартæ хъахъхъæнæг æххæстбарджын минæвары разамындæй Дзæуджыхъæуы абон уыд фæсивæдон æхсæнадон Советы æмбырд. Архайдта дзы республикæйы æрдзон ресурсты æмæ экологийы министры хæдивæг. Ныхас кодтой нæ республикæйы экологийыл. Куыд сбæрæг кодтой, афтæмæй лыггæнинаг æмæ бакусинаг фарстатæ бирæ сты. Заводтæ æмæ æндæр промышленон куыстуæттæ уæлдæф чъизи кæнынц, бырæттæ æмбырдгæнæн куыст дæр куыд æмбæлы, афтæ нæу. Сæ алыварс фæзуæттæ сафынц цæрджытæ сæхæдæг дæр, сæ бырон кæм фæнды калынц æмæ æрдзы рæсугъд бынæттæ хауæццæгтæй нал зынынц. Уавæр куыд аивæн ис, уый фæсивæд фæбæлвырд кодтой. Рахастой уынаффæтæ дæр. Фæнды сæ, цæмæй бырæттæ æвзарой æмæ сæ хицæн кæной сæ химион буаргъæдтæм гæсгæ. Бæстон æрныхас кодтой Уыналы æмæ Фыййагдоны хауæццæгты æмбырдгæнæнтæ ссыгъдæг кæныныл дæр.