Æрвылаз нæ республикæйы сабиты арвитынц Ног азы бæрæгбонмæ Кремлмæ. Равзарынц, ахуыры стыр æнтысдзинæдтæ чи равдыста, олимпиадæтæ æмæ спортивон конкурсты уæлахидзаутæ чи уыд, уыдоны. Сабитæн саразынц цымыдисаг бæрæгбоны программæ. Ацы аз нæ республикæйæ Кремлмæ абалц кæндзысты 36 сабийы. Сæ иу, Змейкæйы 2-æм скъолайы ахуырдзау – Хынцæгты Аминæ.
Хынцæгты Аминæйæн скъолайы исы иттæг хорз бæрæггæнтæ. Алы предмет дæр цымыдис æмæ зæрдæргъæвдæй ахуыр кæны. Ныр æртыккаг аз Аминæйы банымадтой скъолайы хуыздæр ахуырдзауыл. Йæхæдæг куыд зæгъы, афтæмæй йын ахуыр кæнын зын нæу. Ахуыры йæхи хорз кæй æвдисы, уый фæдыл Аминæйы æрвитынц Кремлы Ног азы бæрæгонмæ.
Аминæйы ахуыргæнджытæ куыд зæгъынц, афтæмæй урокмæ кæддæриддæр цæттæ вæййы. Йе ‘мкъласонтæн баххуыс кæнынмæ дæр никуы фæзивæг кæны. Уæдæ скъолайы «Совет лидеров»-ы уæнг дæр у. Советы уæнгтæ бакусынц скъолайы ахсджиагдæр фарстатыл. Ацы аз скъолайы хуыздæр ахуырдзаутæй иуæн фадат фæци Ног азы бæрæгбонмæ Кремлмæ ацæуын.
Ныр Аминæ балцмæ йæхи цæттæ кæны. Ахуыр кæны æмдзæвгæтæ. Уыимæ ма, фæнд кæны фæндырыл ацæгъдын дæр. Ахуыр кæны музыкалон скъолайы æмæ йын хуыздæр цы музыкалон уацмыстæ уайынц, уыдон ацæгъдынмæ хъавы Кремлы бæрæгбоны.
Музыкалон скъолайы ахуыры рæстæгмæ Аминæйы къухы бирæ æнтыстдзинæдтæ бафтыд. Цалдæр хатты сси республикон æмæ æппæтдунеон конкурстæ æмæ æркастыты уæлахиздзау æмæ призер. Афтæмæй йæм хи фæндыр уæвгæ дæр нæй.
Ног азы бæрæгбонмæ Кремлмæ ацæуыны кадджын бар Аминæмæ кæй æрхауд, ууыл цин кæнынц йæ ныййарджытæ дæр.
Æрвылаз нæ республикæйы Ног азы бæрæгбонмæ Кремлæ ацæуыны фадат вæййы алы районты сабитæн дæр. Се ‘хсæн, ахуыры йæхи хуыздæр чи равдыста, уыдон. Стæй хи хардзæй ацæуыны фадат цы сабитæн нæй, уыдон. Ацы аз нæ республикæйы Кремлмæ ацæудзысты 36 сабийы.
Хуыцаубоны Аминæ иннæ сабитимæ араст уыдзæн Мæскуымæ. Ныр та уал йæ цымыдисаг балцмæ æнхъæлмæ кæсы.
Хуасдзауты Алинæ
