Горæты алы цæрæгæн дæр сæйраг парк уарзон бынат у. Йæ саив кæныны хъуыддагмæ æрыдойнæгтæ бæстонæй бацыдысты. Фæнды сæ цæмæй дзы фæзына бандæттæ, тезгъогæнæн фæзтæ æмæ цъæхфæлыст, фæлæ дзы аиуварсгæнинаг фарстатæ дæр ис. Бынаты къуылымпыдзинæдтæ сæвзæры электрон тыхимæ, арæх дзы фенæн вæййы дзæгъæл фос дæр. Æппæтдæр фехъусын кæндзысты бынæттон администрацийы. Проектон семинары адæмы хъуыдытæ фæнысан кæндзысты сæрмагонд картæйыл. Кæд цæрджытæм алыхуызон хъуыдытæ ис, уæддæр сæ фæнд иу у – парчы аивдзинад.
Райгуырæн горæты æддаг хуыз тыхсын кæны Михаил Юхановы дæр. Нæлгоймаджы уырны, нуазыны донимæ фонтантæ парчы æнæмæнг рафидаудзысты, фæлæ йæ æппæты тынгдæр фæнды, цæмæй дзы бесæдкæ фæзына. Цæрджытæ дзы шахмæттæй кæнæ доминойæ хъазиккой, æхсызгонæй сæ рæстæг æрвитиккой кæнæ та дзы иу къæвдайæ амбæхсиккой. Ныртæккæ та уал ам ис æрмæст сывæллæтты фæз, мемориалон комплекс æмæ чысыл спортивон зонæ.
Сæ хъæппæристæ бахастой 30 адæймагæй фылдæр. Спортсментæ, ахуыргæнджытæ, фæсивæд æмæ пенсиисджытæ. Сæ хъуыдытæ сын мæскуыйаг командæ фæнысан кæндзæн кæронбæттæн проекты. Рæгъмæ йæ раххæсынвæнд кæнынц апрелы кæрон.
Уæлдай æргом – бæлæсты бахъахъхъæнынмæ. Æрыдоны ацы фæзмæ раздæр дæр зылдысты, фæлæ бынæттон цæрджыты ныхæстæм гæсгæ, хъуыддаг нæ рауад. Ныр мадзæлттæ æххæст кæнынмæ бæрнондæрæй бацыдысты. Командæйы хыгъды – социологтæ, архитектортæ, экономист æмæ дизайнер. Уыдонмæ горæты куысты фæдыл фæлтæрддзинад ис.
Ууыл фидæнмæ нысантæ нæ фесты. Горæты сæргълæууæджы ныхæстæм гæсгæ, саив кæнын цы бынæттæ хъæуы, уыдон нырма бирæ сты. Æмæ æрмæст Æрыдоны цæрджытимæ иумæйагæй ис территоритæ æнцонвадат, нырыккон æмæ рæсугъд скæнæн.
