25 мин скъолайы нæ бæстæйы алы регионтæй. Архайдтой «Лучшая столовая школы», зæгъгæ, æппæтуæрæсеон конкурсы. Федералон къæпхæн ацыд Мæскуыйы. Уым архайдтой æрмæст 65 хæринаггæнæджы. Се ‘хсæн Цæгат Ирыстоны минæвæрттæ дæр. Æрыдоны фыццæгæм скъолайы хæринаггæнджытæ. Конкурсы архайджытæ жюрийы уæнгты размæ рахастой сæ хуыздæр хæринæгтæ, нозт æмæ æнæмæнг ирон чъиритæ.
Хæрздæф æмæ хæрзад. Абон менюйы пылæу карчы фыдимæ. Семӕ ма цыхт, нæлхæ, дыргътæ æмæ цай.
Сывæллæттæн хæрзад сихор сцæттæ кæнынмæ хæринаггæнджытæ сæ куысты уæлхъус æрлæууынц райсомы 6 сахатыл. Æрцæттæ кæнынц хойраг, лыстæг сæ ныккæрдынц, хайттыл сæ ныддих кæнынц. Хъараты Светланæ скъолайы хæринаггæнæгæй кусы 10 азæй фылдæр. Уый размæ 20 азы фӕкуыста Читайы хойраджы комбинаты инженер-технологæй. Уыцы рæстæгмæ хæринаг кæнгæйæ бирæ сусæгдзинæдтæ базыдта.
Æрыдоны фыццæгæм скъолайы хæрæндоны кусы фæлтæрдджын хæринаггæнджыты къорд. Æрвылбон фыдæбон кæнынц сывæллæтты цинæн. Кортиаты Зæринæ ацы дæсныйады йæхи фæлвары 2 азæй фылдæр. Фидарæй йæ уырны, хæринаггæнæджы стырдæр лæвар — æфсæст æмæ хъæлдзæг сабитæ.
Хъараты Светланæ æмæ Кортиаты Зæринæ Цæгат Ирыстонæй архайдтой «Лучшая столовая школы», зæгъгæ, æппæтуæрæсеон конкурсы. Регионалон къæпхæнты архайдтой 25 мин скъоладзауæй фылдæр нæ бæстæйы скъолатæй. Финалмæ рацыд æрмæст 65 адæймаджы. Се ‘хсæн Æрæфы районы Советское хъæуы хæринаггæнджытæ.
Хæрзад хæринаг скæнынæй уæлдай ма хæрæндоны кусджытæ фæхай кодтой сæ фæлтæрддзинадæй дæр. Радзырдтой, сывæллæтты æнæпайда хæринагæй куыд иппæрд кæнынц, уый тыххæй. Жюрийы уæнгтæ сын скодтой стыр аргъ. Сæ зонындзинæдтæй сын спайда кæндзысты скъолайы хæринаджы ног технологон картæйы.
Хъараты Светланæйы хъуыдымӕ гӕсгӕ, нæ республикæйы кад æнтыстджынæй бахъахъхъæнын сӕ къухы бафтыд скъолайы командæйы иумæйаг архайды руаджы. Хъæугæ æххуыс сын бакодтой регионы ахуырад æмæ наукæйы министрады.
Хæринаггæнджытæн ацы конкурсты архайд стыр æххуыс у. Фылдæр кæны сæ фæлтæрддзинад. Пайда кæнынц нырыккон технологитæй. Сæйрагдæр та скъолаты парахат кæнынц сывæллæттæн пайда хæринаг.
Уазиты Зæлинæ
