«317 хъуыдыйы», афтæ хуыйны национ-наукон чиныгдоны æрыгон фысджытæн цы фестиваль сарæзтой, уый. Мадзал 2-аг аз цæуы Дзæуджыхъæуы. Йæ архайджытæ сты æгас Цæгат Кавказæй æрыгон фысджытæ, сæ курдиат адæмы рæгъмæ рахастой. Сты 12 азæй – 35 азы онг кæуыл цæуы, ахæм айдæймæгтæ. Фестивалы сæйраг хæс у Кавказы фысджыты кæрæдзиимæ базонгæ кæнын æмæ сæ æрбангом кæнын. Фестивалы аразæг Къадзаты Арсены ныхæстæм гæсгæ, архайджытæ фарон азимæ абаргæйæ зынгæ фæфылдæр сты. Фидæны аз, æртыккаг фестиваль куы ацæуа, уæд фæнд кæнынц цыдæриддæр уацмыстæ бацæттæ кодтой поэттæ, уыдон иу æмбырдгонды рауадзын.
Мадина Хасанова, фестивалы архайæг: «Ахæм фестивальтæ хъуамæ арæхдæр арæзт цæуой. Æрыгон поэтты фæнды сæ курдиат равдисын. Алкæмæдæр дзы ис йæхи хъуыдытæ. Фæнды нæ алы адæймагмæ дæр байхъусын. Алы поэтæн дæр ис йæхи цымыдисаг миддуне. Ныхæсты руаджы йæ адæмæн равдисынц».
Къадзаты Арсен, Проект «317 мыслей»-йы автор: «Фестиваль саразын сфæнд кодтон, уымæн æмæ мæхæдæг дæр æмдзæвгæтæ фыссын. Кæддæр мын фадат нæ уыди ме сфæлдыстадимæ адæмы базонгæ кæнынæн. Кæмдæр æфсæрмы дæр кодтон. Бирæ лыстæгдзинæдтæ нæ зыдтон. Фæлæ, йæ куы бамбæрстон мæ хуызæттæ бирæ кæй сты, уæд мæ бафæндыд фестиваль саразын. Цæмæй æрыгон поэтты бон уа адæмы сæ курдиатимæ базонгæ кæнын».
