Цæрдæг æмæ æнæзивæг фæсивæдæй хуыздæр ма цы ис?! Ахæмтæ сты нæ дарддæры æрмæджы хъайтартæ. Æрхъуыды кодтой алыхуызон проекттæ, адæмы цард хъуамæ чи фæрогдæр кæна, ахæмтæ. Ныр та ма рамбылдтой æхца дæр, цæмæй сæ хъуыдытæ сæххæст кæной æмæ республикæйæн пайда `рхæссой. Дзурын та сын уæвгæ дæр ницы хъæуы. Хуымæтæджы нæ вæййынц фестивальты фыццæгты ‘хсæн.
Æрыгон мультипликаторты къорды уæнгтæ æрæмбырд сты æмæ сæхи цæттæ кæнынц регионты хсæн сывæллæтты анимацион кинонывы фестивальмæ. Ацы хатт ныхас кæнынц националон мультфильмтыл. Ацы хъуыддаджы та сын фыццаг æххуысгæнджытæ – бархионтæ. Сæ хæс у кусынæн тематикон ахуыртæ æмæ фæзтæ байгом кæнын, стæй лекцитæ саразын.
Абайты Олег- фæсивæды хъуыддæгты фæдыл комитеты æрыгæттимæ куысты хайады специалист:
“Ацы аз компанийы разамонæг æз уыдтæн. Иумæ цæттæ кодтам грантты проекттæ. Мæхи цæстæй уыдтон, фæсивæд сæхи куыд рæвдз кодтой, уæлахизмæ æмæ хуыздæр уæвынмæ куыд тырныдтой, уый. Фæсивæды цæдисы фæрцы къухы æфты бирæ æнтыстдзинæдтæ. Æрыгæттæн фадат ис сæ курдиат æмæ арæхстдзинад раргом кæнынæн. Иннæты сæ фæлтæрддзинадимæ базонгæ кæнынæн. Уый та пайдайаг у се ппæтæн дæр”.
Конкурсы уæлахиздзауты бæрæг кодтой 6 номинацимæ гæсгæ. Махъоты Мадинæ конкурсы равдыста йæ проект “Семейный фестиваль Бебибум”. Ныридæгæн дæр æй æнтысджынæй сарæзта Дзæуджыхъæуы. Горæты цæрджытæй бирæты зæрдæмæ фæцыд. Сæ цæст ыл æрæвæрдтой жюрийы уæнгтæ æмæ йæ банымадтой хуыздæртæй иуыл. Мæдинæ цы `хца рамбылдта, уыдонæй фæнд кæны йæ проект парахат кæнын.
Фестивалы хатдзæгтæм гæсгæ, ацы аз Уæрæсейы хуссайраг регионты хсæн Цæгат Ирыстон сси хуыздæртæй иу. Специалисттæ куыд зæгъынц, афтæмæй уый стыр æнтыстдзинад у. Уыцы иу рæстæг фæсивæдмæ фæзынд конкурсмæ цымыдисдзинад, ис сæм социалон проекттæ саразынмæ тырнындзинад. Фидæны фестивалы дæр хъуамæ хуыздæртæ уой æмæ ноджы фылдæр гранттæ рамбулой.
