Президенты æвзæрстытæ æргом æмæ сабырæй арвитын, æвзарджытæн баххуыс кæнын, кæм сты, уым схъæлæс кæнын æмæ кампанимæ цæст дарын. Ахæм хæс æвæрынц территориалон æвзарæн къамисы сæргълæуджыты размæ. Абон сын сарæзтой семинар. Ахæм ахуырадон программæтæ цæуынц Уæрæсейы æппæт регионты.
Семинары архайы Цæгат Кавказы æвзарæн барты центры сæрдар Людмила Тхабисимова. Цæгат Ирыстоны центрон æвзарæн къамис куыд кусы, уымæй разыйæ баззад. Уæлдайдæр та канд къамисты уæнгтимæ нæ, фæлæ ма цæстдарджытимæ æмæ фæсивæдон организацитимæ кæй кусынц, уымæй. Ныр дæр специалисттæ æвзарæн хайæдты кусджытæн æмæ сæрдартæн амонынц дызæргыггаг кæнæ гуырысхойаг фарстатæ куыд аиуварс кæнæн ис, уый. Республикæйы центрон æвзарæн къамисы сæрдар Моргуаты Жаннæйы ныхæстæм гæсгæ, ныртæккæ æвзæрстытæм цæттæ сты 80%. 14-æм февралы уыдзæн хæлттæ æппарæн процедурæ. Уæд кандидатты хсæн адих кæндзысты дзыллон информацион фæрæзты лæвар рæстæг. 18-æм мартъийы алы пункты дæр рад хæсдзысты прокуратурæйы æмæ барадхъахъхæнæг оргæнты кусджытæ. Кæсдзысты къамисты уæнгтæ, æвзарджытæ æмæ цæстдарджытæ сæхи куыд дарынц æмæ законхæлдтытæ куыд нæ æрцæуой, уымæ.
