Агропромышленнон комплексы рӕзты фарстаты фӕдыл ӕмбырд ацыд Дзанайты Барисы разамындæй

2026 азмæ хъӕууон хӕдзарады рӕзтӕн рахай кодтой 2 млрд сомы бӕрц. Ууыл ныхас цыд Хицауады сӕрдар Дзанайты Барис агропромышленнон комплексы рӕзты фарстаты фӕдыл цы ӕмбырд сарӕзта, уым. Абон республикӕйы скъолаты ӕнтыстджынӕй кусынц агро-кълӕстӕ. Сӕргълӕууӕг Сергей Меняйлойы фӕдзӕхстмӕ гӕсгӕ цы сӕрмагонд кабинеттӕ байгом кодтой, уым сывӕллӕттӕн ис фадат практикон зонындзинӕдтӕ райсынӕн. Ахуыртӕ иудадзыг амонынц профилон уӕлдӕр ахуыргӕнӕндæтты ахуыргӕнджытӕ. Уымӕй уӕлдай, фӕсивӕд ацӕуынц агропромышленнон куыстуӕттӕм. Хъӕууон хӕдзарады министры хӕстӕ рӕстӕгмӕ ӕххӕстгӕнӕг Мӕхъиты Алан куыд радзырдта, афтӕмӕй абон дарддӕр кусынц инвестортимӕ, цӕмӕй ацы аз ноджыдæр байгом уа 7 агро-къласы. Дзанайты Барис сӕвӕрдта хӕс, цæмæй 1-æм сентябрьмӕ цӕттӕ уой. Ӕмбырды иу ахсджиаг темӕ ма — хъӕууон хӕдзарады тыллӕг ӕмӕ хъӕддыхдзинад фӕбӕрзонддӕр кӕныны тыххӕй донхорыгы рӕзт. Фарон сæ тыхы бацыдысты 3 сæрмагонд проекты Кировы ӕмӕ Мӕздӕджы районты, ӕдӕппӕтӕй сæ субсидиты бӕрц у 129 млн сомы. 2026 азы пъланы ноджыдæр 5 проекты ис. Уый фадат ратдзӕн 1300 гектары зӕхх эксплуатацийы ауадзынӕн. Ныхас ма цыд агротуризмы дарддӕры рӕзтыл. Ацы къабазы куыстуæттæ 2024-2025 азты райстой 230 млн сомы федералон гранттӕ. Сæххæст кодтой 23 проекты. Ацы аз та 12 проектæн нысангонд æрцыд 114 млн сомы.