Ахсджиаг хъуыддæгтыл

Цæгат Ирыстоны хицауады сæрдар Тускъаты Таймураз уыд кусæг балцы Горæтгæрон районы. Уым сæрмагонд æмбырды дзырдтой социалон экономикон райрæзты хъуыддæгтыл.
Районы сæйрагдæр фарстатæй иу у цæрджытæн кусæн бынæттæ саразын. Горæтгæрон районы администрацийы сæргълæууæг Есиаты Русланы ныхæстæм гæсгæ район æнтыстджынæй архайы федералон программæты. Ирыхъæу æмæ Дачныйы аразынц ног сывæллæтты рæвдауæндæттæ. Ног амбулаторитæ фæзындзæн Сунжæйы æмæ Тарскæйы. Районы «Стыр ныхасы» сæрдар Ходты Æхсарбег фæнысан кодта зæххыты фарста. Тускъаты Таймураз куыд бафиппайдта афтæмæй ацы хъуыддаг у ахсджиаг. Уæлдай æргом аздахдæхтой хъæууон хæдзарады къабазмæ. Цæгат Ирыстоны хъæууон хæдзарады министр Уазиты Хъазыбег куыд фехъусын кодта афтæмæй фермерон куыстуæттæн гранты хуызы æххуыс кæнынц. Хъармуаттæй дæр сæ ифтонг кæнынц. Уымæй уæлдай ма куыстуат “Казачий хутор”, зæгъгæ кусы проектыл. Йæ фæлгæты фæнд кæнынц фæткъуыйы бæлæстæ ныссадзын.