Алагиры æмæ Æрæфы районтæ суыдзысты экономикон райрæзты приоритетон зонæтæ. Муниципалитетты курдиæттæн разыйы дзуапп загътой къамисы æмбырды. Сæрдариуæг дзы кодта республикæйы хицауады сæрдары фыццаг хæдивæг Сæбæтхъуаты Æхсарбег.
Алагиры районы пилотон проекты пълæнтты райрæзты тыххæй радзырдта районы сæргълæууæг Бутаты Арсен. Муниципалитеты разамонæджы ныхæстæм гæсгæ, ам фæнд кæнынц экономикон райрæзты ахсджиаг 3 зонæйы саразын. Хъæууон хæдзарады, промышленность, туризмы æмæ реакриацийы къабӕзтӕ. Бæлвырддæр дзургæйæ, Дæллаг Уыналы скусдзæн æхсыры куыстгæнæн нырыккон цех, Мызуры хуыйджыты куыстуат, Уæллаг Зджыды та фæзындзæн туристон хъæу.
Бутаты Арсены ныхæстæм гæсгæ экономикон райрæзты приритетон зонæтæ фадат ратдзысты районмæ инвестицитæ ӕрбахӕстӕг кӕнын, ӕмӕ уый районы социалон-экономикон потенцал фæхъæддыхдæр кæндзæн, фæзындзæн куысты бынæттæ. Инвестициты бæрц уыдзæн 65 милуан сомы. Æрæфы районы курдиат фæнысан кодта бынæттон администрацийы сæргълæууæг Лагкуты Омар. Ам ныхас цæуы дыууæ фæзылдыл: промышленность æмæ туризм. Задалескы фæнд кæнынц диоритыл кусын, хæххон хъæу Къаматы та бакусдзысты туризмы райрæзтыл. Ацы проектты райрæзтæн районы æппæт уавæртæ дæр ис. 2021-æм азмӕ дзы фæзындзӕн 55 куысты бынаты.
