Чысыл ӕмӕ астӕуккаг къӕпхӕны куыстуӕттӕн льготон кредиттӕ райсынӕн лӕвӕрд ӕрцыд 120 милуан сомӕй фылдӕр. Уый тыххӕй фехъусын кодтой республикӕйы экономикон райрӕзты министрадæй.
2020 азы баххуыс кодтой 80 амалхъом адæймагæн. Райсӕн ис цалдӕр хуызы кредит: Хъӕууон хӕдзарады куыстуӕттӕн дӕттынц 5 милуан сомы. Базарадон секторы куыстуӕттӕн – 2 милуан сомы. Кусджытӕн мызд бафидыны тыххӕй кредит дӕттынц 500 мин сомы бӕрц 6 мӕймӕ. Зилдухады кредит дӕттынц 1,5 милуан сомы.
Кредиты ӕмхӕццӕ хуыз, зӕгъгӕ, арӕзт у дыууӕ хайӕ. Фыццаг уал ӕнӕпроцентӕй ӕфстау раттынц 500 мин сомы бӕрц, кусджытӕн мызд бафидыны охыл 6 мӕймӕ. Уыимӕ, ӕнӕмӕнг, хъуамӕ арӕзт ӕрцӕуа дыууӕ куысты бынаты. Ацы домӕн ӕххӕстгонд куы уа, уӕд гӕнӕн уыдзӕн дыккаг хаймӕ рахизын – 1 милуан сомы райсӕн, афӕдзмӕ 2% бӕрц. Ацы кредит исӕн ис, ӕрмӕст хъыгдардбаййафӕг куыстуӕттӕн нӕ, фӕлӕ ма ӕндӕртӕн дӕр. Зӕгъын хъӕуы уый, ӕмӕ коронавирусы рӕстӕг куыстуӕттӕн кредиттӕ иумӕйаг нымадӕй радтой 24 милуан сомӕй фылдӕр.
