Ас, уæз æмæ артериалон æлхъывдад сбарын, туг раттын æмæ æркаст ацæуын. Уыдон сты пъланмæ гæсгæ диспансеризацийы æнæмæнг домæнтæ. Сохиты Зæринæ йе ‘нæниздзинады хъуыддагмæ кæддæриддæр бæрнон цæстæй каст. Дохтыртæм цæуы æппынæдзух.
Диспансеризацийы рæстæг низ рагагъоммæ рабæрæг вæййы. Кар æмæ æрдмæ гæсгæ снысан кæнынц уæлæмхасæн иртæстытæ, зæгъæм, маммографи. 18-æй 39 азы онг кæуыл цæуы, уыдон æркаст ацæуын хъæуы æртæ аз иу хатт, 40 азæй фæстæмæ — æрвылаз. Фыццаг уал дохтырты æркаст, куы бахъæуы, уæд та — хицæн специалисттæм.
Поликлиникæйы лæггад кæнынц Алагиры районы æппæт цæрджытæн, æдæппæтæй 37 мин адæймаджы. Афæдзы райдианæй диспансеризаци ацыдысты æрмæст сæ 40%. Дохтыртæ фæдзæхсынц, цæмæй уæлдай хатт æркаст ацæуыны гæнæнмæ куыдфæндыйы цæстæй ма кæсой. Национ проект “Дæргъвæтин æмæ уæнгрог цард”-ы фæрцы медицинæ æнцонвадат сси.
