Дзæуджыхъæуы Сабырдзинады проспекты 34-æм хæдзар, зæгъæн ис, æмæ зонгæ у горæты алы цæрæгæн дæр. Василий Андреевы особняк дисы ‘фтауы горæты уазджыты дæр. Нымад у Уæрæсейы æмæ Цæгат Ирыстоны культурон нысаниуæгимæ объектыл. Хæдзарæн ис хъæздыг истори. Ардыгæй бирæ номдзыд лæгтæн райдыдта сæ сфæлдыстадон фæндаг.
Ацы бæстыхайы рæзты Дзæуджыхъæуы цæрджытæ æмæ уазджытæ рацу-бацу кæнынц æрвылбон. Фæлæ Уæрæсейы культурон бынты хыгъдмæ цы хæдзар бахастой, уымæн йæ истори цас цымыдис у, ууыл хъуыды дæр нæ акæнынц. Иутæ зæгъынц, нывыл арæзт хæдзар XIX-æм æнусы кæй сарæзта зындгонд хæрзаудæг Христофор Андреев. Историк æмæ бæстæзонæг Феликс Киреевы ныхæстæм гæсгæ та бæстыхайы фыццаг хицау уыд сæудæджергӕнӕг Александр Сухов.
Фыццаг уæладзыджы уыд дуканитæ æмæ хæрæндон. Фæстæдæр хæдзар сси æппæт культурон мадзæлтты сæйраг бынат.
Зындгонд рухстауæг Варвара Шредерс æмæ йæ хорз хæлар Хетæгкаты Къостайы руаджы ацы ран æрбынат кодта фыццаг æхсæнадон чиныгдон. Ам Къоста фыццаг хатт равæрдта йæ ныв «Сыгъдæг Нинæ». Цалдæр бонмæ «иу нывы равдыст» бабæрæг кодта мин адæймагмæ ввахс. Бæстыхайы уыд Адæмон ахуырады хайад дæр, цыбыр рæстæг дзы куыста фыссæг Михаил Булгаков.
Хæдзары истори цымыдисаг æмæ рагон кæй у, ууыл дзурæг сты, цы дзауматæ ма дзы баззад, уыдон. Газы пецтæ, сценæ, стæй архитектурæ дæр уыцы дуджы æууæлтæ бæлвырдæй æвдисынц. Советон дуджы ралæудимæ ам бирæ ивддзинæдтæ æрцыд, фæлæ кæддæр ацы залы дунеон композиторты уацмыстæм иу æмæ дыууæ литературон æмæ кафты изæр нæ ацыдаид. Гæнæн ис, æмæ оркестры бынат уыд растдæр ацы æрдынæгты бын.
Абон фыццаг уæладзыгыл ис «Терчы хъазахъхъæгты культурон центр», «Адæмон æрмдæсныйæдты центр» æмæ «Гæздæнты Гайтойы номыл республикон фæсивæдон чиныгдон». Ам 45 мин чиныгæй фылдæр ис. Се ‘хсæн – уæрæсейаг, фæсарæйнаг, сывæллæтты æмæ скъолайы литературæ, æмæ æрмæст уыдон нæ. Фонд æппынæдзуд цæуы æххæстгонд.
Андреевы хæдзар абон дæр адæмы тынг цымыдис кæны, республикæйы цæрджытæ æмæ уазджытæ йæ арæх бæрæг кæнынц. Хæдзарæй цыма рагон Дзæуджыхъæуы уддзæф цæуы, афтæ кæсы адæймагмæ. Æмæ адæмы уый тыххæй йæхимæ æлвасы.
