Аивæдты лицейы ахуырдзаутæн – бæллиццаг фембæлд. Ахуыргæнæндон бабæрæг кодта дунеон балеты ирддæр стъалытæй иу – Советон Цæдисы адæмон артисткæ Адырхаты Светланæ. Стыр театры примæ æрыгон кафджытæн радзырдта йæ фæлтæрддзинады тыххæй, радта профессионалон амынддзинæдтæ. Аивæдты лицейы хореографион къласæн та радтой зындгонд Адырхаты Светланæйы ном.
Номдзыд прима-балеринæ Адырхаты Светланæйы амынддзинæдтæ ацы чызджытæ, æвæццæгæн, никуы ферох кæндзысты. Аивæдты лицейы Советон Цæдисы адæмон артисткæ æмæ егъау театры балеты труппæйæн æгас цу загъта камерон хор «Алани» æмæ адæмон инструментты ансамбль «Дала фæндыр».
Ныр Адырхаты Светланæйы ном цы хореографион кълас хæссы, уым чызджытæ æвдисынц, 2 азмæ цæуыл сахуыр сты, уый. Зындгонд музыкæйы зæлтæм архайынц раст кафын. Тыхсгæ дæр кæнынц, фæлæ йæ не ‘вдисынц. Æмæ диссаг дæр нæу. Сæ архайдмæ сын лæмбынæг кæсынц Адырхаты Светланæ æмæ раззагдæр театры артисттæ.
«Балеты артист»-ы бынат чысыл куыст нæ домы. Уый хорз зоны егъау театры балетмейстер-репетитор. Кæддæр астаздзыд Адырхаты Светланæ уыд Ленинграды хореографион училищæмæ чи бахауд, уыдоны ‘хсæн. Зындгонд педагогæй амынддзинæдтæ райсын у стыр хæрзиуæг.
«Балеты артист»-ы здæхтмæ гæсгæ кълас байгом кодтой цалдæр азы размæ. Ныридæгæн дзы архайы 8 адæймаджы, æрвылбон дыгай сахаты. Балет хуымæтæг сфæлдыстад нæу.
Адырхаты Светланæйы боны фæткы иу минут дæр уæгъд нæй. У дæсныдзинады ирд дæнцæг. Суинаг артисттæн та зындгонд балеринæйы ном цы хореографийы кълас хæссы, уым архайынц у уæлдай бæрнон хæс.
