Зарæггæнджыты къорд Уацамонгæ рауагъта йæ фыццаг альбом. Иавадуарзджытæ ныггуылф кодтой зарджыты æмбырдгонд æлхæнынмæ. Ныридæгæн дзы ауæй 200-йæ фылдæр. Дисктæ апарахат сты Мæскуйы, Санкт Петербурджы æмæ Уæрæсейы иннæ горæтты. Цалдæр боны размæ та, альбом иу хæрзгæнæджы къухы бафтыд. Йæ зæрдæмæ афтæ тынг фæцыд æмæ уæлдай æххуыс ракодта фæсивæдæн. Уадз æмæ Ирыстоны сфæлдыстад айхъуыса алы къуымты дæр, зæгъгæ. Æмæ уый æцæгæй дæр афтæ у. Фæсивæд тырны размæ. Иу ран нæ лæууы. Алы бон дæр кусынц сæхиуыл. Нæ уацхæссæг Гогаты Марат фæуазæг ис зарæггæнджыты къордмæ æмæ сæ цæттæ гæнгæйæ баййæфта. Бакæсæм сæм!
Ацы курдиатджын фæсивæд сæ кæрæдзийы ссардтой 2 азы размæ. Уæд, æвæццæгæн, æнхъæл дæр нæ уыдысты цæмæ расайдзæн сæ фембæлд. Бархионты лыстæг хъуыддæгтæ базонгæ кодтой 4 æрыгоны. Хæрзгæнджыты митæй уæлдай ма, сæ зæрдæ райы зарынай дæр. Ахæм алæмæты зард æмæ æмхъæлæсон зæлтæ иумæ баиу сты æмæ равзæрд Уацамонгæ. Æмæ кæд сæ фæзынды размæ уацамонгæйы ном хаста диссаджы къус – нарты эпосы, уæд абон та ма йæ адæм зонынц куыд зарæггæнджыты къорд. Фæсивæдыл ма бафтыдис 2 адæймаджы æмæ дзы рауад æцæг ансамбль. Сæхи ныхæстæм гæсгæ, сæ алы зарæг дæр фæмæгуыр вæййы, иу дæр дзы куы фæцух уа, уæд.
Диссаг та нæ уыдаид, исты хуымæтæг зарджытæ куы кодтаиккой – хуымæтæг уарзондзинадыл, адджын цардыл æмæ дзыпп æхцайæ фылдæр кæныныл. Абон ахæм ныхæстæй чи зары, уыдон нæ чысыл Ирыстоны дæр нæ бацæуиккой. Махмæ дæр дзы ис, уæдæ куыд! Фæлæ нæртон зарæг акæнын, тæккæ зындæр куывдыл азæлын æмæ хъæбатырты номарæн зарæг азарын – стæмæн у сæ бон. Мæнæ ацы лæппутæ æмæ цъæхцæст чызгæн та уый бацис са бон. Алчи дæр сæ раст фæндагыл кæй слæууыд, ууыл гуырысхо дæр нæ кæнынц.
Сæ алы репетици ддæр райдайы чысыл ныхасæй. Æрдзурынц ацы хат цы зарджытыл бакусдзысты, ууыл. Стæй уæд æнæхъæн æртæ уæладзыгыл азæлынц сæ тыхджын хъæлæстæ. Иу зарæг фæвæййы æмæ та уæд ныхас дарддæр ацæуы. Бæлвырддæр уæд æркæсынц, кæмæн цы рауад, кæмæн та ма цæуыл бакусын хъæуы, уый. Ансамблы разамонæг Ходы Олег лæмбынæг хъусы алы композицимæ, рахæсы йæхи хаддзæгтæ æмæ сæ фæсивæдæн хъазгæйæ бамбарын кæны.
Ходы Олег йæхæдæг ис Паддзахадон филармонийы адæмон уадынгæрзты оркестры сæргъы дæр. Йæ ныхæстæм гæсгæ, бирæ нал хъæуы æмæ ансамбль музыкалон инструменттыл дæр цæгъдын байдайа. Ныридæгæн сæхиуыл нæ фæхæцынц æмæ исты музыкалон кусæнгарзыл сæ къухтæ авæрынц. Уæд репертуар дæр апарахат вæййы.
Ног зарджытæ ныффысын зарæггæнджытæ хъуыды дæр нæ кæнынц. Фыццаджыдæр уал сæ фæнды цæмæй национ зарджытæ адæм базоной. Хъусой сæм æмæ сæ бауарзой. Уыцы хæс сабыргай æххæст кæнынц. Концерттæ, равдыстытæ æмæ æндæр мадзæлтты архайынц. Се сфæлдыстад сын зонынц канд Ирыстоны æмæ Уæрæсейы нæ, фæлæ ма фæсарæнты дæр. Хонынц сæ сæхимæ. Уыимæ ма, æрджыты рауагътой сæ фыццаг альбом дæр. Уымæй та стыр бузныг сты Битарты Алыксандрæй. Фылдæр æй зонынц, куыд диджей Алекс. Куы базонгæ ис семæ, уæд ахæм хъуыддагæн дæр æнæрцæугæ нæ уыди.
Дискыл ис 14 зарæджы. Ансамблы репертуары та æдыппæтæй 30 зарæгæй фылдæр. Алы зарæджы дæр ис æвæрд стыр мидис. Артисттæ архайынц, уыцы мидис адæмы зæрдæтæм куыд хуыздæр бахæццæ кæной, ууыл.
Гогаты Марат, Гаглойты Сергей – Ирыстоны Хабæрттæ.
