Дзæуджыхъæуы бирæкъабазджын техникумы бындурон цалцæг йæ тæмæны бацыд. Бæстыхай агуыридуры онг ныссыгъдæг кодтой. Айстой зæронд къулсæрст æмæ пъолтæ, специалисттæ цæттæ кæнынц нырыккон æмæ æнцонвадат ахуыргæнæндон. Рацарæзт цæуы нацпроект “Фæсивæд æмæ сывæллæттæ”-мæ гæсгæ. Хæххон-металлургон техникумы корпус Ватутины уынджы сарæзтой суанг 1962-æм азы, уæдæй дзы цалцæг нæ цыд.
Проектмæ гæсгæ цалцæг хъуамæ фæуой ацы азы кæронмæ. Специалисттæ нысангонд фæтк ййафынц æви нæ, уый сбæрæг кæнынмæ бынатмæ сæмбæлд республикæйы хицауады сæрдары фыццаг хæдивæг Атарты Георгий. Ныхас кæны куыстытæ æххæстгæнæгимæ æмæ хæссы йæ фиппайнæгтæ. Уæлдай æргом здахы æдасдзинадмæ, бахæс кодта инструктажмæ лæмбынæгдæр уæвын, алцыдæр нысан кæнын сæрмагонд журналы.
Рацарæзтмæ цæттæгæнæн мадзæлттæ æххæстгонд цæуынц педагогон колледжы æмдзæрæны дæр. Æрвылбон бынаты 20 специалистæй фылдæр. Ам дæр бындурон ивддзинæдтæ хъæуынц. Бæстыхай эксплуатацийы радтой 1971-æм азы. 54 азмæ заууатмæ æрцыдысты æппæт коммуникацитæ, æмткæй бæстыхай зилинаг уыд. Æмæ дзы ныр ног уддзæф бауадздзысты нацпроект “Фæсивæд æмæ сывæллæттæ”-мæ гæсгæ. Объект раттынвæнд кæнынц афонæй раздæр, ног ахуырадон азы размæ.
Атарты Георгий бабæрæг кодта егъау социалон объекттæй иу. Дзæуджыхъæуы ацæргæ адæмæн æмæ инвалидтæн аразынц хæдзар-интернат. Куыстытæ райдыдтой афæдзы райдиан. Уыцы рæстæгмæ бакодтой егъау куыст, фæлæ аразинæгтæ нырма бирæ. Социалон кусæндон республикæйы цæрджытæн суыдзæн æцæг хæдзар, бынат дзы уыдзæн 200 адæймагæн. Сæ фæллад дзы суаддзысты, ссардзысты дзы зæрдæмæдзæугæ хъуыддаг: спорты архайын, библиотекæ, бассейн æмæ зымæгон дыргъдон бабæрæг кæнын. Арæзтадон куыстытæ фæуынвæнд кæнынц афæдзы кæронмæ.
Арæзтадон сезон республикæйы ис йæ тæмæны. Бындуронæй цалцæг кæнынц бирæ социалон кусæндæттæ. Хицауады сæрдары фыццаг хæдивæг Атарты Георгий куыд фæнысан кодта, афтæмæй фылдæр объектты куыстытæ фæуыдзысты азы кæронмæ.
