Афтæ, сыфтæртыл, кæнæ хъуымацы гæппæлтыл гыццыл дур бафидар кæнгæйæ, сæхи ирхæфстой рагон Китайы фæсивæд. Сæ хъазт схуыдтой лянга. Махмæ куыд æрбафтыд, уый бæлвырдæй зæгъæн нæй. Гæнæн ис, æмæ суанг аланты рæстæг, уымæн æмæ Аланыстоны æхсæнад Китайы уыд суанг 14-æм æнусы онг. Æрмæст хъазтæн йæ ном, стæй хъазæнæн йе ‘рмæг дæр ивд æрцыдысты.
Хъуамæ чъопп къахæй хæрдмæ ‘ппарай, зæхмæ йæ уадзæн нæй. Фадхъул кæнæ зæвæты ‘рдыгæй йæ куы фехсай, уæд бынтон хорз. Уый зындæр у æмæ стырдæр бæрæггæнæн райсдзынæ.
Чъоппæй чемпионаты архайдтой 24 адæймаджы, кармæ гæсгæ дзы арæнтæ нæй. Фыццаг бынат бацахста Хестанты Сæрмæт, æвзист майданы хицау — Булацаты Дзамболат, хуыздæрты хыгъд сæхгæдта Эльмин Бахшалиев. Ныртæккæ “Ирон федераци” йæ размæ ахсджиаг хæс сæвæрдта.
Чемпионат арӕзт ӕрцыд Цæгат Ирыстоны Адӕмон спорты хуызты ӕмӕ хъӕзтыты федераци ӕмӕ нӕ республикӕйы Физкультурӕ ӕмӕ спорты министрады фӕндонмӕ гӕсгӕ. Ерыстӕ гом кӕнгӕйӕ, спортсментӕ ӕмӕ спортуарзджытӕн зӕрдиаг арфӕ ракодта “Аланты Ныхасы” сӕрдар Фриаты Хъазыбег. Йæ ныхасмæ гæсгæ, ирон адӕмон спорты хуызтӕ рохуаты уадзæн нæй. Тыхтыл тых æфтауынц.
Уыцы иу рæстæг залы иннæ кæрон — ивазæнтæ. Æдӕппӕтӕй сæ 100-йæ фылдæр спортсмены архайдтой, уыдоны ‘хсӕн чызджытæ дӕр. Уӕлахиздзаутӕ ӕмӕ призон бынӕттӕ бацахсджытӕ хорзӕхджын систы майдантӕй, дипломтӕй ӕмӕ ӕхцайы лӕвӕрттӕй. Уымæй уæлдай, хуыздæртæ иугонд командæйы хыгъды архайдзысты æппæтуæрæсеон ерысты ивазæнтæй — мас-рестлингæй.
