Уæдæ чи зоны хуыздæр йе ‘взаг? “Æз разынон дæсныдæр”-æй ахæм бирæ фæсивæд æрбамбырд, æмæ зæххæн уæз кæнынц. Ныр дыккаг аз фæд-фæдыл ирон æвзаг æмæ литературæйы олимпиадæйы архайджыты нымæц, иннæ предметтимæ абаргæйæ, æппæты фылæр у. Хæслæвæрдтæ сарæзтой Ирон æвзаджы райрæзты центры æмæ Ирон æвзаг æмæ литературæйы кафедрæйы кусджытæ иумæйагæй. Скъоладзаутæ ныры онг цы æрмæг рацыдысты, уый дзы иууылдæр хыгъд æрцыд. Иуæндæсæмкъласонты 8 фарстæн хъæуы дзуапп раттын. Æз дæр сыл мæ цæст ахастон.
Ацы хæслæвæрд æххæстгæнгæйæ, зындзинæдтæ хъуамæ макæмæ сæвзæра. Уымæн æмæ муниципалон æмвæзадмæ æрмæст хуыздæртæ рахызтысты. Дзæуджыхъæуккаг ахуыргæнинæгты 11-æм скъола суазæг кодта. Æдæппæтæй 600-йы бæрц, 7-æмæй 11 къласы онг. Се ‘хсæн — ирон æвзаг мадæлон кæмæн нæу, ахæмтæ дæр. Бынтон æхсызгон у, фæсарæнты чи схъомыл, фæлæ нæ мадæлон æвзагыл йæ зæрдæ чи не сивта, уыцы фæсивæд.
Арæзт та афтæ сты, цæмæй ног æмвæзадмæ ахизгæйæ, скъоладзау, къæппæджы бахауæгау, ма уа. Иу къæпхæнæй иннæмæ цæугæйæ йæ фембары, хæслæвæрдтæ цас фæзындæр уыдзысты, уый. 9-æм къласы 10 хæслæвæрдæй иу у — чысыл нывæцæн ныффыссын, 5-7 хъуыдыйадæй арæзт.
Муниципалон къæпхæны уæлахиздзаутæ, ома, хуыздæрты хуыздæртæ архайдзысты республикон олимпиадæйы.
Райсом та фæсивæд ерыс кæндзысты ирон литературæйæ зонындзинæдтæ равдисынæй. Дзæуджыхъæуы ахуыргæнинæгты ногæй суазæг кæндзæн 11-æм скъола.
