Ацы бонты Цæгат Ирыстоны мысынц 1992-æм азы цаутæ. 30-æмæй 31-æм октбры æхсæв Горæтгæрон районы бацайдагъ сты æхстытæ. Змæстыты рæстæг фæмард 500 адæймагæй фылдæр. Минмæ хæстæг фесты цæфтæ. 200 адæймагæй фылдæр абон дæр ма нымад сты æбæрæгæй сæфтыл.
Æрвылаз республикæйы ацæуынц номарæн мадзæлттӕ. Ирыстоны хъахъхъæнджыты ингæнтыл дидинджытæ сæвæрдта регионы разамонæг Сергей Меняйло. Мадзалы ма архайдта Парламенты сæрдар Тускъаты Таймураз, уыимæ æхсæнадон организациты минæвæрттæ, æфсæддонтæ.
Республикæйы хицауады сæрдар Дзанайты Барис та мысæн мадзæлтты архайдта Камбилеевкæйы хъæуы. Хицауады уæнгтимæ дидинджытæ сæвæрдта республикæйы хъахъæнджыты мемориалыл. Трагикон цауты амæттæгты нæмттæ сæ бинонтæ æмæ хиуæттимæ сардтой минут æдзæмæй алæугæйæ.
