Фæлтæрддзинад фæфылдæр кæнын æмæ курдиæттæ раргом кæнын. Ахæм фадат президентты грантты конкурсы уæлахизы фæстæ фæзынд инклюзивон къордтæн. Республикæйы райдыдта æртæмæйон скъола. Вокал, хореографи, сценикон грим – уый ӕппӕт фæзылдты æрмæст иу кæцыдæр хай. Ахуыртæ амондзысты уырыссаг æмæ ирон театры специалисттæ, сывӕллӕттӕн ма дæсныйадæвдисæн ахуыртæ скæндзысты Казан æмæ Мæскуыйы эксперттæ.
Нæ респуликæйы ис 8 инклюзивон къорды. Алкæцы дæр сæ архайы сфæлдыстады æнтыстджын къахдзæфтæ кæныныл. Аразанц алыхуызон мадзæлттæ, æвæрынц спектаклтæ. Фæлæ уыдон æрмæст сæ иугондты ‘хсæн. Ныр сын фæзынд ног гæнæн. Уый руаджы хæдахуыр æмвæзадæй сæ бон у профессионалонмæ рахизын. Ахæм гæнæн сæ къухы бафтыд президенты грантты æркасты фӕуæлахизы руаджы.
Ахуырты руаджы рæзы дикци, артикуляци æмæ архайд. Ардæм хауынц сценикон грим, вокал, кафт, актеры дæсныйад æмæ режиссурæ. Скъолайы архайдзысты 90 адæймаджы, уыдонæй 30 – се ‘нæниздзинад хъыгдæрд кæмæн у, ахæмтæ. Ахæм «æмхæццæ» кълæсты фæрцы сывæллæттæ æхсæнады ‘хсæн æнгомæй архайдзысты.
Ахуыртæ цæудзысты ацæргæ адæмы хæдзар-интернат «Узæлд»-ы. Ахуыргæнджытæ – уырыссаг æмæ ирон театрты профессионалон актёртæ. Дæсныйадæвдисæн ахуыртæ та араздзысты Казань æмæ Мæскуыйæ эксперттæ. Æртæмæйон ахуыртæ фæуыдзысты егъау концертæй.
Мадзаларазджытæ – социалон хъæппæристы райрæзты змӕлд «Арктур» æмæ театралон архайджыты цæдис. Программæйыл фæнд кæнынц дарддæр кусын. Хæстæгдӕр рæстæг инклюзивон къорд байгом кæндзысты Хуссар Ирыстоны дæр.
