3 азы бӕрц Любовь Агапова ӕрбацӕуы бархионты штабмӕ куыд куыстмӕ, афтӕ. Уый йын у ахсджиаг хъуыддаг. Тохы бынаты ныртӕккӕ сты йӕ цоты цот ӕмӕ йӕ хӕрӕфырттӕ. Бархион архайды фӕндаг сылгоймаг райдыдта маскировкӕгӕнӕн хызтӕ бийынӕй ӕмӕ акъоппыты цырӕгътӕ аразынӕй. Ныр та сахуыр тепловизорты ныхмæ зонттӕ аразын.
Любовь Агапова зоны: тохы быдыры лыстӕг хъуыддӕгтæ нӕ вӕййы. Алы сынк дӕр миллиметры онг барст у. Ахӕм зонттæ уадзыны технологи, зæгъæн ис, зæрингуырды куыст у. Фыццаг уал каркасыл хъæуы ныффидар кæнын тынтæ чи нæ уадзы, ахæм сӕрмагонд купол. Уый æдде цӕуы фидар зӕлдагӕй хыз. Фӕлӕ сӕйрагдæр у, цæмæй æнæхъæн уа. Иу уӕлдай хуынкъ дæр фехалдзӕн конструкци æнæхъæнæй. Уымӕ гӕсгӕ хыз фидар кӕнынц ӕрмӕст хуыдтытыл, зына-нӕзына бӕрӕг чи дары, ахӕм сынчытыл.
Уый фӕстӕ — спанбонд. Лыг ӕй кӕнынц ӕмӕ йӕ бийынц, зонт алфæмбылай æрдзы бæрæг куыд ма дара, афтӕ. Уый у Запорожьейы бур кӕрдӕг дӕр ӕмӕ Донбассы фӕныкхуыз рыг дӕр. Кӕд зын аразӕн вæййы, уӕддӕр конструкцийы, зӕгъӕн ис, ӕмӕ уӕз нæй. Килограмм ӕмӕ ӕрдӕг — каркас, 500 граммы та — æмбæхсæн.
Ахӕм куполтæ ам дӕсгай ис, бархионтӕ та — сӕдӕгай. Змӕлд “Хуыйӕм ӕмӕ бийæм нӕхионтӕн. Уарзондзинадимӕ Ирыстонӕй”-ы филиал иу бæстыхайы баиу кодта алыхуызон дӕсныйӕдты адӕмы. Дзӕуджыхъӕуы сын агъуыст рахицӕн кодтой амалхъом адӕймæгтæ. Зынаргъ ӕрмӕджытӕ ӕлхӕнынӕн та ӕхца æрвитынц ӕгас дунейæ дӕр. Ӕрвылбон ацы цехы фӕллой кӕнынц 15 адӕймаджы онг. Цӕттӕ дзауматæ фронтмӕ æрвитынц æппынæдзух. Фӕхӕццӕ сӕ кӕнынц бархионтӕ сӕ фурæтыл.
Бархион архайд кармæ гæсгæ нæу æмæ уый ам хъуыддагӕй фидар кӕнынц. Бибылты Эмилияйыл цӕуы 84 азы. Штабы тыххæй газетӕй базыдта ӕмӕ йæ бон не сси иуварс баззайын. Цалынмӕ иутӕ зонттæ ӕмбырд кӕнынц, уӕдмӕ уый госпитӕлтӕн базтӕ хуыйы ӕмӕ æфсæддонты згъæр худтæн агъудтæ аразы. Зӕгъы: куыст ӕхцон у, дӕ къухтӕ искӕй цард фервӕзын кӕнын кӕй фӕразынц, уый куы зонай, уӕд.
Бархион архайд Ирыстоны сси дыккаг фронт. Абон фӕсчъылдым ӕмӕ тохы раззаг бынæтты ‘хсӕн арӕнтӕ нæй. Адæмы иу кæны хионты бахъахъхъӕныны фӕндон.
