Базарадон-экономикон техникумы студенттæ архайдтой дæсныйад æвдисæг ахуырты. Базыдтой кондитеры дæсныйады сусæгдзинæдтæ. Дзæуджыхъæумæ ссыдысты Уæрæсейы хуыздæр хæринаггæнджыты ассоциацийы минæвæрттæ. Æрыгон адæмы цæттæдзинад дисы бафтыдта мæскуыйаг специалистты. Цы хæринæгтæ æрцæдтæ кодтой, уыдон та равæрæн ис хуызджр ресторанты. Афтæ у æви нæ, уый тыххæй нæ дарддæры æрмæг.
Базарадон-экономикон техникумы сарæзтой æцæг бæрæгбон. Бæркадджын фынгтæ, алыхуызон аддджинæгтæ æмæ дыргътимæ. Æрыгон хæринаггæнджытæ тынг бæстонæй архайынц, кæсынц фæлтæрдджын кондитерты змæлдмæ. Ацы мадзал сын фадат дæтты сæ курдиат раргом кæнынæн.
Студентты ахуыр кæнынмæ ссыдысты Уæрæсейы хуыздæр хæринаггæнджыты ассоцацийы уæнгтæ. Статистикæйы бæрæггæнæнтæм гæсгæ, ацы дæсныйад æрыгæтты ‘хсæн кадджын нал у. Ахсджиаг у студентты сцымыдис кæнын. Кондитерты авналæтæ уæрæх сты. Уæлдайдæр сфæлдыстадон архайды, зæгъынц специалисттæ.
Студенттæ-кондитерты цæттæдзинад дисы бафтыдта мæскуыйаг хæринаггæнджыты. Фæсивæдæн ацы ахуыртæ фыццаг фæлтæрдзинад у. Фæлæ æрыгон адæм æнцонæй цæттæ кæнынц хæринæгтæ. Суанг ма хойрагæй снывæндынц райгуырæн горæты рæссугъддæр бынæттæ. Ныфс сæ ис, сæ конд хæринæгтæ фидæны кæй суыдзысты егъаудæр хæрæндæтты фадауц.
