Беслæны рацараздзысты мемориалон комплекс “Зæдты сахар”

Цæгат Ирыстоны цæттæ кæнынц мемориалон комплекс “Зæдты сахар” саив кæнынмæ. Уый тыххæй федералон бюджетæй радих кодтой 110 милуан сомы. Пъланмæ гæсгæ сног кæндзысты къахвæндæгтæ æмæ кæрдæгфæзтæ, сæвæрдзысты брусчаткæ æмæ уæлингæнтæ. Проектон-хыгъдон документтæ цæттæ сты, ныртæккæ цæуы паддзахадон экспертизæ. Проекты хицæн хай – цыртдзæвæн “Хъыджы бæлас”-ы реставраци. Дзуапдæттæг организаци цæттæ кæны историон-культурон кæронбæттæн хатдзæг райсынмæ. Куыстытæ дзы цæудзысты паддзахадон программæ “Цæгат Кавказы федералон зылды рацарæзт”-мæ гæсгæ, баххæст сæ кæндзысты ацы азы кæронмæ. 2024-æм азы Беслæны трагедийыл сæххæст 20 азы, арæзт æрцыд номарæн мадзæлттæ. Уæд Владимир Путин бахæс кодта мемориалон уæлмæрды рацарæзт райдайын. Æрмæст æмдыхæй архайгæйæ ис теракты амæттæгты хъуыды кæнын. Æмæ, паддзахады Сæргълæууæг куыд фæнысан кодта, афтæмæй, уый у нæ иумæйаг хæс.