Беслæны теракт арф фæд ныууагъта бирæ адæмы царды. 2004 азы 1 сентябры ног ахуыры азы фæдыл линейкæмæ скъоламæ ацыдысты Бæдуаты Миланæйы бинонтæ дæр. Чызгыл уæд 4 азы цыд. Фæлæ, уæддæр ирдæй хъуыды кæны уыцы бонтæ.
Ацы къамтæй ма хъуыды кæны Миланæ йæ уарзон фыды. 2004 азы 1 сентябры чызджы цард цæхгæрмæ фæивта. Уыцы бон Миланæйы хистæр æфсымæр бацыд фыццæгæм къласмæ. Æппæт бинонтæ дæр цингæнгæйæ цæттæ кодтой ахуыры азы райдианмæ. Мад, фыд, нана æмæ Миланæ иумæ ацыдысты 1-æм сентябры линейкæмæ. Фæлæ, 4-аздзыд чызг кæуын райдыдта, æмæ сæ нанайы бахъуыд хæдзармæ йемæ аздæхын. Фæстæдæр куыд разынд, афтæмæй сæ адзалæй фервæздысты.
Миланæ уыцы æртæ боны мысгæйæ зæгъы, афтæ каст, цыма уыцы 72 сахаты æнусы бæрц уыдысты, афтæ. Кæд ыл 4 азы цыд, уæддæр æй æмбæрста, стыр бæллæх кæй æрцыд, уый. Йæ нанаимæ æнхъæлмæ кастысты, сæ бинонтæ ногæй иумæ кæд сæмбырд уыдзысты, уымæ. Фæлæ, Миланæйы мад куы фехъусын кодта, сæ фыд фæмард, зæгъгæ, уæд сæ цард æрлæууыд. Нæлгоймаг уыд фыццаг бон терорристтæ кæй амардтой, уыдоны ‘хсæн.
Сывæллоны фервæзын кæнын- уый уыд мад æмæ фыды хойы иунæг хъуыды. Алы срæмыгъд æмæ æхсты рæстæг дæр æй æмбæхстой сæ фæстæ. Уыцы æвирхъау цаутæй тасы куыд нæ бацыд 7-аздзыд лæппу. Фæлæ, уæддæр йæхиуыл хæцыныл архайдта, Миланæйæн йæ мад куыд радзырдта, афтæмæй.
Беслæны теракт цы адæмы цард фæивта, уыдонмæ 17 азы фæстæ дæр, уыцы цаутæ раст цыма знон уыдысты, афтæ кæсы.
2004 азы сентябрь раивта бирæ адæмы хъысмæт æмæ цард. Рох гæнæн ын нæй. Фæлæ, ахæм цаутæ ахуыр кæнынц царды алы бон æмæ минутæн дæр стыр аргъ кæныныл.
Миланæйы æфсымæр Алекс уæлдæр ахуырад райста. Ныртæккæ службæ кæны æфсады. Миланæ йæхæдæг ахуыр кæны Мæскуыйы. Фæнд кæны йæ цард экономикæйы къабазимæ сбæттын. Цард дарддæр цæуы. Фæлæ, Беслæны рыст никуы банцайдзæн.
