Республикæйы райдыдтой мысæн æмæ номарæн бонтæ. 17азы размæ Беслæны æбуалгъ фыдракæнд дунейыл айхъуыст. Æвирхъау цау ахаста 334 царды, 186 уыдонæй сывæллæтæ. Беслæны цæуы æрвылазон «Мысæн Вахтæ». Мысынц теракты амæттæгты. Беслæны бынаты ис нæ уацхæссæг Гугкаты Иринæ. Комкоммæ бастдзинады фæрцы ныртæккæ йемæ аныхас кæндзыстæм. Иринæ, хъусæм дæм.
Беслæны дарддæр цæуы Мысæн вахтæ…
Ныртæккæ мах стæм Беслæны, 1-æм скъолайы. Абон райсомæй райдыдта мысæн вахтæ. 9 сахаты æмæ 15 минутыл куыд 17 азы размæ, афтæ ацы аз дæр азæлыд дзæнгæрæг. Райсомæй нырмæ республикæйы æхсæнадон минæвæрттæ, цæрджытæ, республикæйы уазджытæ ардæм цæуынц.
Æвæрынц дидинджытæ. Алчидæр сæ йæ хæсыл нымайы терракты амæттæгты æрымысын. Номарæн мадзæлтты архайдта республикæйы сæргълæууæджы хæстæ рæстæгмæ æххæстгæнæг Сергей Меняйло дæр. Хицауады уæнгтимæ иумæ. Скъолайы къултыл – теракты амæттæгты къамтæ. Залы астæу – стыр хъæдын дзуар æвæрд. Ам, йæ цуры, арæзт æрцыд теракты амæттæгты æрæмысыны аргъуыд.
