Дæс мæймæ Битарты Валерия рæзыд æнæниз сывæллонæй. Ахуыр кодта фыццаг къахдзæфтæ кæнын, йæ ныййарджытæ йыл цин кодтой. Бинонтæ æнхъæл дæр нæ уыдысты сæ цард иу минутмæ цæхгæр кæй фæивдзæн, ууыл. 2018-æм азы 27 июль чызджы мад, Плиты Зæлинæ никуы ферох кæндзæн. Уый йæ фембæрста сабийæн йæ хъару кæй фæцыдæр, уый. Сылгоймаг фæтарст. Чызджы фæхæццæ кодта Республикæйы клиникон рынчындоны исæн хайадмæ. Сывæллонæн йæ хæцъæфтæ æлхынц кодтой, бауадзыг – раиртæстой йæм эпилепси кæй хонынц, уыцы низы миниуджытæ. Цалдæр мæйы саби фæци реанимацийы, уыд æм инсульт. Дохтыртæ скодтой сæ бон цы уыд, уый.
Чызг аирвæзт, фæлæ фæстиуджытæ уæззау сты – низ расайдта сывæллæтты церебралон параличмæ. Йæ дыууæ къахы дæр нæ кусынц, йæ бон дзурын нæу. Æрвылбон æм фæзынынц йæ низы миниуджытæ. Хъуыгагæн, æрæджы фæтыхст, дыууæ къуырийы, уæззау уавæры, арвыста реанимацийы. Фæлæ бинонтæн сæ ныфс нæ сæтты. Афæдз цалдæр хатты Валерия ацæуы дзæбæхгæнæн мадзæлттæ. Сæ фæрцы ныртæккæ йæ бон цыбыр рæстæг бадын сси.
Валерияйы уавæр фенцондæр кæнæн ис Грецийы. Чызджы мад фæсарæйнаг дохтыртимæ фембæлд Мæскуыйы. Специалисттæ ныфс бавæрдтой сывæллоны къæхты уавæр фæхуыздæр кæнынæй. Уый Валерияйæн фадат ратдзæн слæуынæн.
Уый фæстæ ма ацæудзæн реабилитаци – иумæйагæй дзбæх кæныны рæстæг – 56 боны. Уымæн бахъæудзæн 48 мин евройы, уый у цыппар æмæ æрдæг милуан сомæй фылдæр. Ахæм фæрæзтæ чызджы бинонтæм нæй.
5 мæйы размæ социалон хызæгтæй бинонты тыххæй базыдта æхсæнадон архайæг Радихан Азизов. Уый баххуыс кодта фæрæзты æмбырд байгом кæнынæн. Зæрдæхæлар адæмы фæрцы ныридæгæн бантыст 1 милуан 186 мин сомы сæмбырд кæнын. Ноджы ма хъæуы 3 милуан 414 мин сомы.
Битарты Валерияйæн йæ бон алкæмæн дæр баххуыс кæнын у. Уæ экрантыл уынут фæрæзтæ кæдæм арвитын ис – картæ æмæ телефоны номыртæ. Æрмæст иумæйагæй нæ бон у чызджы уавæр фенцон дæр кæнын.
