Æвзонг артисттæ хъазынц цыбыр этюдтæ. Сæ мидис алыхуызон, æрымысынц сæ сæхæдæг. Афтæ ногæй æрбацæуæг фæсивæды ахуыр кæнынц цаутæ разурын, сценæйыл хъазын, партнеримæ æмархайд кæнын. Дигорайы Театр “Сатирикон”-ы актерæ сталытæй уæлдай не сты. Кæдæм сæ нæ ахонынц, ахæм бынат нал баззад. Лæппутæ æмæ чызджытæ — ирд, сæрбæрзонд, аивадуарзæджы тавиц уарзаг.
Ам, æнæмæнг, актер суæвынмæ нæ бæллы алчи. Бирæты фæнды се ‘нкъарæнтæ уæндонæй æргом кæнын базонын. Суанг ма уроктыл дæр фæныфсджын вæййынц. Сæ дзуаппытæ систы дардылхъуысгæ, фидар, æдæрсгæ, æмæ уый сценæйы руаджы. Ам фыццаг къахдзæфтæ чи акодта, уыдонæй бирæтæ ныр стыр сценæтыл хъазынц.
Театры специализаци у сатирæ. Хъазгæ-худгæйæ адæймаджы аиппытæ равдисынц: зыд, хæлæг, æнæрвæссондзинад. Театрдзау бахъæлдзæг вæййы æмæ уыцы иу рæстæг хъуыдытыл бафты. Режиссёр Къорнаты Дианæ алкæмæй дæр профессионалон актерæй къаддæр нæ домы. Йæхæдæг дæр ирон сценæйы стъалыты къухты схъомыл. Каст фæци ЦИПУ-йы актерон хайад æмæ райгуырæн Дигорамæ æрыздæхт. Бабар ын кодтой сфæлдыстадон фæсивæды баиу кæнын. Йæ хæс æвиппайды бамбæрста.
Культурон райрæзты центр Дигорайы сарæзтой национ проект “Культурæ”-йы руаджы. Ныййарджытæ-иу æрбацыдысты æмæ куырдтой гитаристты къорд æрæмбырд кæнын. Разамонджытæ сын сæ фæндыл бакуыстой. Музыкалон инструментыл цæгъдын базонын æнцон нæ разынд, фæлæ кæй фæнды, уыдон сахатгай фæкусынц. Се ‘нгуылдзтæ тасын райдыдтой æмæ ныридæгæн тæнтыл цæрдæг згъорынц.
Фæсивæды репертуары нырыккон мелодитæ бирæ ис. Педагог зивæг нæ кæны, сæ уарзон зарджыты аккордтæ семæ сахуыр кæны. Фæлæ æнæмæлгæ хиттæ, зæгъæм, зындгонд рок-къорд “Кино”-йы “Кукушка” урокты æнæмæнг темæ у.
Культурон райрæзты центры ис 18 аивадон къорды. Сывæллæттæ æмæ хистæртæн дæр сты лæвар. Уæвгæ, раздæр дæр зарыдысты, кафыдысты, ныв кодтой, фæлæ сæ уавæртæ къуындæг уыдысты.
Культурон центрмæ 600 адæймагæй фылдæр цæуы. Ныртæккæ сæхи цæттæ кæнынц сæ ног æнтыстытæ кæм равдисдзысты, уыцы концертмæ.
