Серго æмæ Инга Еприкянты хæдзары ныр цалдæр азы кæддæриддæр вæййы сабыр. Алы къуымы дæр сæ фырты къамтæ. Алы хуызистæй дæр лæппу кæсы хъæлдзæг, мидбылхудгæйæ. Сæ фырт кæй фæмард, уый тыххæй Инга базыдта йæ сæрыхицауæй.
Æрыгон Георгийы агуырдтой 11 боны. Уыцы рæстæг Инга æмæ Серго цы æнкъардтой, уый, æвæццæгæн, ничи бамбардзæн. Сылгоймагмæ æрмæстдæр уыдис уыцы иу хъуыды — дарддæр цы уыдзæн, куыд цæрдзыстæм? 23-æм февралы Георгий Еприкян уыд, Украинæйы территоримæ фыццаг чи бацыд, уыцы солдæтты ‘хсæн. Уæд лæппуйы фыд Серго йæхæдæг фæхæццæ Херсоны арæнмæ. Цалдæр боны нæлгоймаг лæууыд уадзæн посты, бантыстис ын йæ фыртимæ аныхас кæнын телефонæй.
Лæппу йæ фыдæй куырдта, цæмæй фæстæмæ аздæха. Æз мæ хæлæртты нæ ныууаддзынæн, зæгъгæ. Кæддæриддæр ныфсхаст æмæ хъæбатыр. Уыдис сфæлдыстадон, алывæрсыг адæймаг. Цыдис ирон кафджытæм, футболмæ, зарыд æмæ цагъта гитарæйыл. Алы хатт дæр рæстдзæвин, фæлитой митæ чи нæ уарзта, ахæм. Уыцы миниуæг æм уыд гыццылæй фæстæмæ, зæгъынц йæ ныййарджытæ. Уæвгæ, йæ цард дæр радта сæрибардзинад æмæ сабырдзинады сæраппонд.
Георгий Еприкян йæ хæлары систа судзгæ танкæй, уыцы рæстæг йæ зæрдæйыл сæмбæлд снайперы нæмыг. Виталий Дядюшко æмæ Бестауты Сæрмæтимæ базонгæ сты тохы быдыры, æппынæдзух уыдысты иумæ. Георгийы фæстæ дыккаг бон фæмард сты Виталий æмæ Сæрмæт дæр. Къамты дæр сæ равдыстой иумæ. Сæ нæмттæ æнусмæ фыст æрцæудзысты Уæрæсейы историйы.
