Доны хæтæлтæ атыдтой, кърантæй згæ дон кæлы, электрон тыхы телтæ аcкъуыдысты. Ахæм фарстаты фæдыл цæрджытæ дзурынц Иугонд радгæс-диспетчерон службæйы номырмæ. Æрвылбон цы курдиæттæ райсынц, уыдон суанг минмæ дæр схæццæ вæййынц. Æппæт лыстæгдзинæдтæ дæр хаст æрцæуынц хицæн программæмæ. Дарддæр сæрмагонд къорд æвæстиатæй сæмбæлы бынатмæ.
Дистпечеры телефон ныззылланг кодта. Дзæуджыхъæуы цæхæрадæтты æмбалæдтæй иуы дон нæй. Цæрджытæ уавæры тыххæй фехъусын кодтой Иугонд радгæс-диспетчерон службæмæ æмæ уавæрæй бæрæг базоныныл зæрдæ дарынц. Специалисттæ уыцы иу рæстæг курдиат фæнысан кодтой æмæ йæ дзуапдæттæг службæмæ алæвæрдтой. Æмæ афтæ æнæрлæугæйæ.
Байхъулты Ритæ диспетчерон службæйы кусы йæ байгомæй абонмæ — 13 азы. Ног азыл дæр сæмбæлыд телефонты уæлхъус, курдиæттæ исгæ æмæ фарстатыл кусгæйæ. Службæйы кусæн программæ афтæ арæзт у, æмæ дзы диспетчер фарста куы фæнысан кæны, уæд уыцы иу рæстæг дзуапдæттæг управленимæ дæр фæхæццæ вæййы. Зæгъæм, горæты уынгтæй иуы электрон тыхдæттæг телтæ атыдтой.
Цæрджытæ арæхдæр æрбадзурынц доны хæтæлтæ быронæй куы байдзаг вæййынц, уæд. Фарон ахæм курдиæттæ 2700-йæ ахызтысты. Дыкка бынаты — рухс кæй ахуыссы, уый фæдыл фарстатæ — уыдысты мин æмæ ‘рдæгæй фылдæр. Æдæппæтæй афæдздзмæ бакуыстой 93 минмæ ввахс курдиатыл. Ардæм ис номыр 112-мæ æрбадзурæн дæр, 5 мины та уыцы номырмæ æрвыст фарстатæ уыдысты. Иугонд радгæс-диспетчерон службæйæйы бригадтæ хи тыхтæй аиуварс кодтой 6500 аварийы.
— Æрвылбон, æрвылсуткæ сæдæгай крдиаты райсынц нæ кусджытæ. Уæдæ боныхъæд æвзæр куы вæййы, кæнæ та цæрæн-коммуналон хæдзарады системæйы егъау аварион уавæр куы æрцæуы, уæд мин-мин æмæ æрдæгмæ дæр схизынц. Æмархайд кæнæм горæты æппæт радхæссæг-диспетчерон æмæ æвæстиаты службæтимæ. Мах стæм радхæссæг-диспетчерон службæты уæлдæр оргæн. Æппæт информаци махмæ цæуы. Мах та йæ дзуапдæттæг кусæндæттæм æрвитæм фарста аиуварс кæныны тыххæй. Кæцыдæртæ нæхи бригадты бæрны бакæнæм. Муниципалон хæслæвæрдтæ уыдонмæ хауынц.
Æнæнхъæлæджы уавæртæ ма ‘руадзын æмæ алыхуызон фыдбылызты фæстиуджытæ иуварс кæнын — службæйы сæйраг хæс. Æмæ уый йæ кусджытæ æнæаипп æмæ зæрдæргъæвдæй æххæст кæнынц.
