Англисаг драматург Брендон Томасы сфæлдыстадмæ фыццаг хатт йе ‘ргом аздæхта Дыгурон драмон театр. Оперæ æмæ балеты театры сценæйыл ацыд пьесæ «Тётка Чарлея»-мæ гæсгæ æвæрд спектакль «Бразилиаг уазæг». Комеди аивадуарзджыты размæ рахаста режиссёр, Цæгат Ирыстоны адæмон артисткæ Секъинаты Элитæ.
Оксфорды дыууæ æрыгон студенты Чарли æмæ Джек бауарзтой Эми æмæ Киттийы. Фæлæ XIX æнусы онг чызгæн иунæгæй цæуæн никуыдæм уыд, йемæ хъуамæ уыдаид хистæр кары сылгоймаг. Хъæздгуытæ-иу æй баххуырстой фæсдзыд кæнын æмæ æгъдаумæ хъус дарыны тыххæй. Уарзæттæ фембæлыныл баныхас кодтой, фæлæ сылгоймаг фæндагыл ныффæстиат. Лæппуты ‘мбал аразгæ сæрыхъуын æмæ къаба скодта æмæ семæ йæ бæсты ацыд. Ацы фæлгонц раргом кæнын æрхауд Гагулаты Сосланмæ.
Æрыгон актёр Гагулаты Сослан каст фæци Цæгат Ирыстоны паддзахадон университеты аивæдты факультет. Йæ цард театримæ кæй сбæтдзæн, уый кæддæриддæр зыдта.
«Бразилиаг уазæг» æвæрд у англисаг драматург Томас Брендоны пьесæ «Тётка Чарлея»-мæ гæсгæ. XVII-æм æнусы фыст уацмыс уæды рæстæджы рекордтæ иууылдæр басаста. Комеди ратæлмац кодта æмæ сæвæрдта республикæйы адæмон артисткæ Секъинаты Элитæ.
Спектаклы сæйраг фæлгонцтæ раргом кодтой 9 актёры. Се ‘хсæн куыд фæлтæрдджын актёртæ – адæмон артисттæ, афтæ аивæдты факультеты студенттæ дæр. Ам, дыгурон театры, æрыгон курдиæтты райрæзтыл æппынæдзух кусынц.
Секъинаты Элитæйы ныхæстæм гæсгæ, режиссёр спектаклыл кусын куы райдайы, уæд, фыццаджыдæр, хъуамæ актёртæн бамбарын кæна, театрдзауты размæ цы сæйраг хъуыды рахæссынмæ хъавы, уый. «Бразилиаг уазæг»-ы уый у – уарзондзинад.
Уарзондзинады темæ та кæдфæндыдæр адæмы зæрдæтæм фæндаг ссары. Афтæ рауад ацы хатт дæр. Уæвгæ, Дыгурон театрыл йæ аивадуарзджытæ иузæрдион сты.
Дыгурон театр дарддæр архайдзæн аивадуарзджыты зæрдæтæ рухс кæныныл, куыд рагæй кæй бауарзтой, афтæ ног æмæ цымыдисаг спектакльтæй дæр.
