Евгений Вахтанговы визиткæ. Уæд Мæскуыйы университеты студент уыд, ныртæккæ МГУ кæй хонынц, уый. Авджы бын — ахуырмæ цы гæххæттытæ балæвæрдта, уыдон: сæудæджерты номдарады æвдисæндар, хъомылдзинады аттестат, экзаменты чиныг. Фидæны театралон режиссер ахуыр кодта юристыл. Фæстæдæр æй райстой Мæскуыйы аивадон театры труппæмæ. Ног экспонаттæ Евгений Вахтанговы чысыл райгуырæн бæстæмæ Мæскуыйæ схæццæ сты. Бæлвырддæр та, йæ номыл театрæй. Хæдзар рацаразыны хъуыды дæр уым райгуырд. Æнусы размæ цы хуымæтæг Студентон студи байгом кодта Вахтангов, уымæй рауад цымыдисаг сфæлдыстады хуыздæр куырдадзтæй иу.
2015-æм азы Вахтанговы номыл театр гастрольты Цæгат Ирыстонмæ ссыд. Артисттæ бабæрæг кодтой, 1883-æм азы режиссер кæм райгуырд, уыцы бынат. Фæлæ се ‘нхъæлц æмæ æцæгдзинад кæрæдзийыл не сбадтысты. Абон бæстыхай чи уыны, уый уырнгæ дæр нæ бакæндзæн, 1920-æм азæй дзы коммуналон агъуыстытæ кæй уыд. Вахтанговы номыл театры артисттæн табуйаг цы хæдзар у, уый заууат уавæры ссардтой. Æвиппайды бæрнондзинад сæхимæ райстой. Сфæнд дзы кодтой музей саразын. Проект зынаргъ у æмæ чиновниктæ æмхъæлæсæй дзырдтой, ницы дзы рауайдзæн, зæгъгæ. Фæлæ фæстæ ничи фæлæууыд вахтанговонтæй.
Хистæр артисттæ хъуыды кæнынц — хæдзар суанг ахафынмæ дæр схъавыдысты. 1983-æм азы, Вахтанговы 100 азы юбилеймæ, йæ номыл театр гастрольты Дзæуджыхъæумæ ссыд. Афишæйы уыд режиссеры “Принцесса Турандот”. Горæты райрæзты генпланмæ гæсгæ, хæдзар халынмæ хъавынц, уый базонгæйæ, артисттæ хъынцъым кæнын райдыдтой. Уæд сæйраг роль хъазæг Советон Цæдисы адæмон артисткæ Юлия Борисова, цæссыгкалгæйæ, сценæйæ фæсидт: “Кæд уын нæ иумæйаг зæрдылдарæн зынаргъ у, кæд уе ‘мзæххон Вахтанговы номæн, махау, сæрæй ныллæг кувут, уæд уын лæгъстæ кæнын, бахъахъхъæнæм ын йæ хæдзар!”. Йæ курдиат ын фехъуыстой.
Евгений Вахтанговы тынг фæндыд Библимæ гæсгæ спектакль сæвæрын, фæлæ йæ къухы нал бафтыд. Чиныг абон дæр йæ кусæн стъолыл ис. Уаты ноджыдæр иу экспонат — Константин Станиславскийы бюст. Гениалон театралон режиссёр Вахтанговы фыццаг æмæ фæстаг постановкæ “Принцесса Турандот”-æн стыр аргъ скодта. Лæвар музейæн скодта Уæрæсейы адæмон артист Александр Олешко. Йæхæдæг дæр вахтанговон у. Хæдзары байгомыл дыууæ азы рацыд.
Æвирхъау егъау архайды дыууæ азæй фылдæр æмæ 250 милуан сомы хи фæрæзтæ. Уæлхæдзар — 19-æм æнусы æмбæрзæндурæй. Къултæ баххæст кодтой революцийы агъоммæ агуыридурæй. Хъахъхъæд цы хуызæгтæ æрцыдысты, уыдонмæ гæсгæ рудзгуытæ æмæ дуæрттæ скодтой. Рацарæзтой бацæуæн дæр. Фыццаг уæладзыгыл уыд режиссеры фыды тамакойы дукани. Арт-кафе ныр уым ис. Фæзмы Артаты театры фæзуат. Цы равдыстытæ дзы вæййы, уыдонмæ æгас Уæрæсейæ дæр ссæуынц, билеттæ та æппынæдзух развæлгъау аскъæфынц.
Евгений Вахтангов дзырдта: “Бæрæгбон нæй — нæй спектакль дæр”. Майы репертуар аивадуарзджыты зæрдæмæ æнæмæнг фæцæудзæн. 1-æм æмæ 2-æмы — композитор, пианист, Уæрæсейы аивæдты сгуыхт архайæг Махъоты Ацæмæз. Уæдæ уыдзæн хъæбатырон зарæджы изæр, Уæлахизы зарджытæ, Чайковский æмæ Рахманиновы романстæ. Гергиты Ларисæ амондзæн концерт-лекци “Вахтанговы дуджы Дзæуджыхъæу”, зæгъгæ. Вахтанговы хæдзар — нæ сæйраг сахары аивдзинад.
