Магкæты Зурабы уынджы цæрджытæ дзæгъæл куыйтæй хъуырмæ систы. Радон сидтмæ Владпитомникы специалисттимæ ацыд не сфæлдыстадон къорд дæр. Адæм хъаст кæнынц, зæгъгæ, кæртытæй иуы хъæхъхъаг куыйты бал æрцард. Дæс минуты дæр нæ рацыд, афтæ сæ ссардтам.
Таддаджы æртæ буаргъæды ис: ксила — рыстуромæн, метадин — сабыр кæнæн æмæ фынæйы хос йæхæдæг — везотил. Уæлдæфон пистолеты шприцæй сцъирынц хос. Иу куб — дæс килæйы уæзæн.
Хос уайтагъд нæ сахады. Æхсты фæстæ ма куыдз, гæнæн ис, цалдæр километры дæр алидза. Уый тыххæй йæ фæстæ зилын хъæуы. Уый та, раст зæгъгæйæ, æнцон нæу. Цæрæгой куы кæм амбæхсы, куы кæм: хæдтулгæйы бын, парчы, хъæды… Ацы хатт, нæ амондæн, дард нæ алыгъд.
Специалисттимæ æнæхъæн бон арвыстам. Хъæстытимæ сæм дзырдтой алы дыууæ сахаты фæстæ дæр. Куыйтæ сывæллæттæм дæр лæбурынц.
Чысыл Викторияйы нана Кокуаты Лидия сывæллæтты цурæй куыйты иу æмæ дыууæ хатты нæ асырдта. Æттæмæ уадзын дæр тæрсгæ кæнæм сабиты, — зæгъы сылгоймаг.
Фарста ног нæу. Зæгъæм, ацы кадртæ сты Дзæуджыхъæуы уынгтæй иуы камерæйæ. Лæппу бырæттæ æппарынмæ рахаста, хæдзармæ та аздæхт хæцтытæ æмæ тыдтытæй. Куыдз ыл йæхи ныццавта. Специалистты ныхасмæ гæсгæ, цæрæгой ныртæккæ Владпитомникы ис, æппæт хъæугæ процедурæтæ йын скодтой. Æртæ къуырийы цæстдард æмæ стерилизаци. Кæд хъæхъхъаг нæу куыдз, уæд æй фæстæмæ кæм уыд, уым ауадзынц.
Стерилизацигонд куыйтæ дæр балгай сæмбырд вæййынц. Стæй ацы процедурæ цы цæрæгойтæн не скодтой, ахæмтæ гыццыл не сты. Æмæ, фылдæрæй фылдæр кæнынц, кæй зæгъын æй хъæуы. Фарста куыд ис райхалæн, уый бæлвырд нæу ныртæккæ. Иутæ зæгъынц фесафын сæ хъæуы, иннæты фылдæр питомниктæ куы уаид, уый фæнды.
Æмæ, хъыгагæн, ахæм уавæр ис æгас Уæрæсейы дæр. Уæдæ, зæгъм, Германи, Израиль, Испани кæнæ Чехийы куыдз дарыны размæ хъæуы сæрмагонд курсытæ ацæуын, фæлварæн раттын æмæ лицензи райсын. Цæрæгойы куы нæ срегистраци кæнай, уæд дæ фæивар кæндзысты. Уынгты куыйты куы ‘рцахсынц, уæд сæ фæстæмæ нал раттынц зилын сæм чи нæ зоны, уыдонæн. Ног хицæутты дæр сын ссарынц. Цæрæгойы фесафын бирæты зæрдæмæ нæ цæуы. Æбуалгъ фыдракæндыл æй нымайынц. Иу хъуыдымæ нæ цæуы æхсæнад. Кæсаг, хæфс æмæ цъиусуры æмбисонды ми ныл кæны: “Абон дæр ма уыцы дур денджызы ис, уæ мæ хур”
