Дзæуджыхъæуы бындурон цалцæджы фæстæ байгом 4-æм поликлиникæйы филиал. Куыстытæ дзы цыдысты национ проект “Дæргъвæтин æмæ уæнгрог цард”-мæ гæсгæ. Кадджын мадзалы архайдта Цæгат Ирыстоны сæргълæууæг Сергей Меняйло. Регионы разамонæг федта бæстыхæйттæ, аныхас кодта поликлиникæйы кусджытимæ, дзæбæхгæнæндон лæггад кæны 30 мин адæймагæн. Бындурон цалцæг дзы 1977-æм азæй фыццаг хатт скодтой, баивтой коммуникацитæ, базылдысты бæстыхайы сæр æмæ разуындмæ. Уæлдай æргом аздæхтой хъыгдард æнæниздзинадимæ адæмы уавæртæм, удæнцойдзинадæн сæйраг медицинон блоктæ скодтой кæрæдзимæ хæстæг. Фæзынд дзы сылгоймæгтæн æмæ нæлгоймæгтæн хицæн палатæтимæ боныгон стационар. Скуыста ма дзы онкологон æххуысы амбулаторон центр гыццыл операцион залимæ. Поликлиникæйы ма ис хирургон, физиотерапион, медицинон профилактикæйы, терапийы хайæдтæ. Регионы сæргълæууæг куыд фæнысан кодта, афтæмæй медицинон объектты модернизаци у ахсджиаг æнæниздзинадхъахъхъæнынады системæйы. Бындуронæй цалцæггонд поликлиникæйы арæзт æрцыд æнцонвадат уавæртæ, ифтонггонд у нырыккон кусæнгæрзтæй.
