Дзæуджыхъæуы 5-æм профессионалон училищæйы хуыйджыты къорды студентты æрмæст хуыйын нæ ахуыр кæнынц, фæлæ ма сæхи фæлварынц цымыдисаг æрмдæсныйады. Ныртæккæ ахуыргæнæндон куыд ифтонг у, уый студенттæн дæтты фадат сæ фæлтæрддзинад уæлдæр кæнынæн. Ныры онг дзы цы къорд кусы, уый та æрвылаз дæр хорзæхджынгонд цæуы кады гæххæттытæй æмæ сертификаттæй. Нæ уацхæссæг Къутæрты Аидæ бæлвырддæр радзурдзæн.
Черчесты Гаянæ нæ республикæйы 5-æм профессионалон училищæйы кусы 2005-æм азæй нырмæ. Йæ сæйраг хæс у мæнæ ацы студентты хуыйын сахуыр кæнын. Æмæ афтæмæй куыстуæттæм профессионалон хуыйджыты цæттæ кæнын. Фæлæ æрмæст студенттимæ нæ кусы Черчесты Гаянæ, фæлæ ма скъолаты ахуырдзаутимæ дæр. Ныр сæм къорд азы дæргъы ис æрмдæсныты къорд.
Дзæуджыхъæуы 5-æм профессионалон училищæйы хуыйджыты къорды ахуыргæнæг Черчесты Гаянэ: «Мах архайдтам бирæ конкурсты. Зæгъæм, нæ фыццаг куыст куы аластам, уæд нæм диссаг касти, кæй дзы архайæм, уый. Абонимæ абаргæйæ, уый стыр æнтыстдзинад нæу. Фæлæ ныр хуыздæр цæттæ стæм. Цы равдисæм, уый нæм ис».
Черчесты Гаянæйы разамындмæ гæсгæ студенттæм ныры онг ис бирæ æнтыстдзинæдтæ. Уыдон канд адæймаджы дзаумæттæ хуыйын нæ зонынц, фæлæ ма сæ арæсхтдзинад фæлварынц куклаты дзаумæттæ хуыйынмæ дæр. Черчесты Гаянæ нын куыд радзырдта, афтæмæй ныртæккæ æртыккæгæм курсы цы студенттæ ис, уыдон рагæй бæллыдысты исты ног хъуыдыйыл бакусынмæ.
Черчесты Гаянэ: «Хуыйын куы базыдтой ацы чызджытæ, уæд баныхас кодтам, тагъд рæстæджы куклатæм кæй рахиздзыстæм, уый. Уыимæ ма нæ бафæндыд нæ куыст Хетæгкаты Къостайы 160 азы юбилеймæ сбæттын. Афтæмæй райдыдтам куклатæ æмæ сæ дзаумæттыл архайын».
Цæмæй сæ дæсныйад фæбæрзонддæр уа, уый тыххæй ацы студенттæ бацархайдтой конкурс «Пульс моды»-йы. Сæ куыст дзæгъæлы нæ уыд. Райстой фыццаг бынат. Ныр дæр та ацы къорды студенттæ сæхи цæттæ кæнынц ног ерыстæм. Фестивль «Студенческая весна» кæй хонынц, уымæ та цæттæ кæнынц япойнаг дзаумæтты коллекций. Уымæй уæдай ма ацы къорды хуыйынц «тильда» зæгъгæ, куклатæ дæр.
Черчесты Гаянэ: «Мах архайæм алыхуызæн хъуымæцтæй. Мæнæ мæ къухы цы тильда ис, уый кодтам мæйы дæргъы. Хъуамæ уал сывæллæттæ сахуыр уой æппæт лыстæг хицæндзинæдтимæ архайын, стæй та уæд рахизой иннæтæм».
Ныртæккæ дзы студенттæ архайынц. Ис сæм сæхи хъуыдытæ æмæ фæндтæ. Фæнды сæ базонын хорз хуыйын, стæй ма уымæй уæлдай сæрмагонд коллекци саразын. Цалынмæ студенттæ кусгæ кодтой, уæдмæ та сын æхсызгон лæвар. Æрæджы цы конкурсы бацархайдтой, уырдыгæй сын æрбарвыстой сертификаттæ.
Ацы училищæйы бындурыл дыккæгæм аз цæуынц алыхуызон конкурстæ æмæ ерыстæ. Уыимæ ма студенттæ арæхсынц кафæн дзаумæттæ хуыйынмæ дæр.
Дзæуджыхъæуы 5-æм профессионалон училищæйы хъомыладон куысты сæргълæууæджы хæдивæг Лариса Малахова: «Куы йæ фениккат, сæ ахуыргæнæг сæ куыд ахуыр кæны подиумыл цæуын, уый! Дзæгъæлы нæ ахуыр кæнынц сæхи ууыл. Ацы чызджытæ ма сты дизайнертæ дæр. Сæ – ном “Элит”. Уыдон сæрмагондæй кæнынц профорентацион куыст дæр».
Ацы фæсивæд цæттæ сты ног зонындзинæдтæм æмæ сæм тырнынц. Афтæмæй сæ фæлтæрддзинад бæрзонддæр кæны.
Къутæрты Аидæ
