Дзæуджыхъæуы 50-æм скъолайы ивддзинæдтæм рагæй æнхъæлмæ кастысты æмæ ныртæккæ сæ къухы бафтыдысты. Сывæллæттæ æрбаздæхтысты сæ партæты уæлхъусмæ, бæстыхай йæ хуыз скалдта. Ног мебель, нырыккон интерактивон ифтонггæрзты фæрцы æмбæлгæ уавæртæ фæзынд ахуыр кæнынмæ. Ахæм кълæсты æхсызгон у педагогмæ хъусын, æнтыстджынæй архайын, фæлтæрæнтæ æххæст кæнын æмæ урокты нымæцон технологитæй пайда кæнын.
Цалцæджы рæстæг уæлдай æргом аздæхтой хæрæндонмæ. Ам дæр сног кодтой мебель, сæвæрдтой дзы ног кусæнгæрзтæ, фæивтой аходæнты зал. Къæбиц сси райдзаст, уæрæх, уавæрты фæрцы та дзы æххæст кæндзысты æппæт санитарон домæнтæ дæр, тæвд хæринагæй дзы ифтонг кæндзысты алы кары скъоладзауты. Хъæрмхуыппытæ, дзидзайæ æмæ халсартæй конд хæринæгтæ, фæлмæн дзул æмæ хæрздæф адджинæгтæ – æрвылбоны меню æххæст у алцæмæйдæр.
Спортивон залы сывæллæттæн сæхи ирхæфсынц спортивон хъæзтыты, физкультурæйы. Ам æххæстæй баивтой пъолты уæллаг цъар, самал кодтой нырыккон ифтонггæрзтæ – сывæллæтты бæрны бакодтой ног баскетболон щиттæ, турниктæ, физкультурæйæн хъæугæ дзауматæ.
Ацы къултæ æвдисæн сты æнусмæ хæстæг историйæн. Бæстыхайæн бындур сæвæрдтой 1937-æм азы – раздæр ацы бынаты уыд нæлгоймæгты æфсæнвæндаджы техникум. Уæдæй дзы бындурон цалцæг никуы уыд. Рæстæгимæ агъуыстытæ æдасдзинады домæнтæн дзуапп нал лæвæрдтой. Куыстытæ дзы пъланмæ гæсгæ хъуамæ райдыдтаиккой 2027-æм азы, фæлæ сæвзæрд уавæрмæ гæсгæ – кълæстæй иуы цар куы æркалд, уæд уый фæстæ уынаффæ тагъддæр рахастой.
Куыстытæ дзы цыдысты афæдзмæ хæстæг. Уыцы рæстæгмæ дзы æрцыд æххæст ивддзинæдтæ. Зæгъæн ис, æмæ бæстыхай рацарæзтой: баивтой дзы инженерон хызтæ, цар, разуынд. Агъуыстыты бауагътой ног уддзæф, ныр дзы рауад нырыккон æмæ æдас бынат ахуыр кæнынæн.
