Классикон музыкæйы зæлтæ айхъуыстысты Сабырдзинады проспекты, сæудæджер Яков Ходяковы историон бæстыхайы балкъонæй. Дзæуджыхъæуы арæзт æрцыд ӕрвылазон фестиваль “Музыка балконов. Великие реки”, зæгъгæ. Концерт æрбамбырд кодта республикæйы цæрджыты æмæ уазджыты. Аивадуарзджыты зæрдæтæм фæндаг ссардта Мæскуыйы театр “Геликон-опера”-йы солист, Цæгат Ирыстоны сгуыхт артист Дмитрий Скориков. Проект фæзынд 3 азы размæ Дæллаг Новгороды æмæ апарахат. Афтæмæй программæ сси Æппæтуæрæсеон. Æрмæст ацы аз бæстæйы алы горæтты нысангонд æрцыд 27 концерты.
“Акцийы нысан – баиу кæнын цымыдисаг архитектурон фæзуат регионы культурæ æмæ историимæ. Æмæ нын, кæй зæгъын æй хъæуы, æхсызгон у, цы субъекттæ равзæрстой ацы аз, уыдонимæ кæй ис нæ горæт, нæ диссаджы Сабырдзинады проспект, йæ цымыдиссаг историон бæстыхæйттимæ”.
“Ацы сезоны тематикæ у – зындгонд цæугæдæттæ. Уымæ гæсгæ æвзæрстам цы дæттæ ис нæ бæстæйы, уыдонæй. Æмæ Терк, æцæгæй дæр у вазыгджындæр цæугæдæттæй иу, хъæздыг историимæ. Мах хъуыдымæ гæсгæ Дзæуджыхъæу нæ фестивалæн у хорз фæзуат. Балкъонтæм дæр кастыстæм, æмæ равзæрстам Яков Ходяковы бæстыхай”.
