Ирд фæлгонцтæ æмæ рæсугъд æнкъарæнтæ. Оперæ æмæ балеты театры ацыд фестиваль. Сбастой йæ Александр Островскийы райгуырды 200 азимæ. Сæ курдиат равдыстой скъолаты театралон къордтæ. Æрыгон артистты ‘хсæн уыд, куыд сценæмæ фыццаг хатт чи рахызт, афтæ йæ фидæн театримæ чи сбаста, ахæмтæ дæр.
Фестивалы архайджытæ ахæм ирд фæлгонцтæ аразынц, æмæ адæймаджы сæ курдиат дисы ‘фтауы. Аивад уарзынц, сæ цард фæнд кæнынц театримæ сбæттын. Фæсивæдæй кæйфæндыдæр куы бафæрсай, уæддæр дын зæгъдзæн, фидæны æнæмæнг артист кæй суыдзæн.
Скъолаты театрты фестиваль сбастой зындгонд фыссæг Александр Островскийы райгуырды 200 азимæ. Сфæлдыстадон къордтæ æрбамбырд сты Оперæ æмæ балеты паддзахадон театры. Æвдыстой драматургы уацмыстæй скъуыддзæгтæ. Рæзгæ фæлтæры чысыл спектакльтæм бакаст республикæйы ахуырад æмæ наукæйы министр Алыбегты Эллæ дæр.
Æрыгон курдиæттæн раарфæ кодта Уæрæсейы адæмон артисткæ Гергиты Ларисæ дæр. Бæлвырд сын радзырдта Александр Островскийы цард æмæ сфæлдыстады тыххæй.
Абон республикæйы скъолаты ис 148 театры. Проект аххæссыд æгас бæстæйыл, æххæст æй кæны Культурæ æмæ рухстауыны министрад Щукины номыл театралон институтимæ иумæ.
