Мæскуыйы облæсты ацыд æппæтуæрæсеон конкурс «Большая перемена»-йы æрдæгфинал. Æдæппæтæй дзы архайдтой 6 мин адæймагæй фылдæр Уæрæсейы алы регионтæй. Се ‘хсæн Дзæуджыхъæуы базарадон-экономикон техникумы студенттæ. Цыппарæн бантыст æрдæгфиналмæ рацæуын. Астæуккаг профессионалон ахуырад конкурсы ацы аз фыццаг хатт архайдта.
Быронисæн пункты спайда кæнæн уыдзæн QR -кодæй. Уый руаджы мобилон уæлæфтуан банымайдзæн баллтæ. Схардз кæнæн сæ уыдзæн экологон æгъдауæй сыгъдæг продукттыл. Ахæм проект æппæтуæрæсеон æркаст «Большая перемена»-йы фæлгæты равдыстой Дзæуджыхъæуы базарадон-экономикон техникумы студенттæ. Цыппарæй рацыдысты конкурсы æрдæгфиналмæ. Фыццаг къæпхæнты архайдтой дистанцион хуызы.
Конкурсы регистраци райдыдта мартъийы. Техникумæй дзы архайдтой 200 студенты. Экологи, туризм, медиа æмæ ахуырадон технологиты рæзт. Алкæй бон дæр уыд зæрдæмæдзæугæ къабаз равзарын. Фæсивæд бакуыстой куыд иумæйаг проекттыл, афтæ хицæн хæслæвæрдтыл дæр.
Æппæтуæрæсеон конкурсы æрдæгфинал ацыд комкоммæ хуызы Мæскуыйы облæсты 1-æм октябрæй 6-æм октябры онг. Сæ арæхстдзинад дзы æвдыстой Уæрæсейы алы регионтæй 6 мин архайæгæй фылдæр. Æркасты хæслæвæрдтæ сарæзтой бæстæйы раззагдæр универститеттæ æмæ компанитæ. Конкурсы сæйраг нысан у скъоладзаутæ æмæ студенттæн сæ курдиаттæ раргом кæнын. Лекцитæ, дæсныйадæвдисæн ахуыртæ æмæ фембæлдтытӕ Уæрæсейы алы къабæзты дæсны специалисттимæ. Æрдæгфиналы программæ уыд бирæвæрсыг.
Конкурсы кæронбæттæн къæпхæн уыдзæн ноябры. Хуыздæртæ райсдзысты премитæ. Сæ бон сæ уыдзæн ахуырады спайда кæнын. Стæй ма, уæлдæр ахуыргæнæндонмæ бацæугæйæ, уæлæмхасæн баллтæ райсынӕн.
Хуасдзауты Алинæ
