Хæстæг рæстæг Дзæуджыхъæуы райхъуысдзæн ног трамвайты цæлхыты уынæр. Нырыккон домæнтæм гæсгæ ифтонггонд транспортæй зæрдæ рухс кæны. Бæлццæтæн дзы уыдзæн сæ чырæ телефонты тых баххæст кæныны фадат. Уымæй уæлдай, информацион монитортæ, видеоцæстдарды системæ, кондиционертæ. ДЕПО бабæрæг кодта горæты администрацийы разамынд.
ДЕПО-мæ бахизгæйæ, цæстытæ уайтагъд ацахсынц ног вагæттæ. Се ‘ддаг бакаст – зæрдæмæдзæугæ. Зæронд трамвайтæ сæ разы бӕрӕг цауддӕр сты. Ног транспорт фæхæццæ кодтой Екатеринбургы завод «Уралтрансмаш»-æй.
Трамвайтæ сластой хайгай, уымæ гæсгæ сæ æрæмбырд кæнынæн хъæуы рæстæг. Ног транспæртон фæрæзтæ федта горæты администрацийы разамынд. Милдзыхты Вячеслав куыд фæнысан кодта, афтæмæй ма афæдзы кæронмæ республикæ райсдзæн ноджы иу трамвай. Афтæмæй, транспортон инфраструктурæйы къабаз регионы æнтыстджынæй рæздзæн.
Ног вагæтты æдæппæтæй уыдзæн 178 адæймагæн бынат. Трамвайæ ныр æнæкъуылымпыйæ пайда кæндзысты, йе ‘нæниздзихздзинад хъыгдæрд кæмæн у, уыцы цæрджытæ дæр. Ис сын дзы сæрмагонд схизæнтæ. Специалисттæ куыд зæгъынц, афтæмæй трамвайтæ арæзт сты нæ бæстæйы уагъд æрмæджытæй. Дзуапп дæтдзысты æдасдзинады домæнтæн.
Ног вагæттæ æддаг бакасты аивдзинадæй уæлдай алцæмæй æххæст сты мидæгæй дæр. Салоны ис чырæ телефонты тых баххæст кæнынæн сæрмагонд гæрзтæ, информацион монитортæ, видеоцæстдарды системæ, кондиционертæ. Кусджыты ныхæстæм гæсгæ, уазалгæнæн гæрз уæлдай хъæугæ уыдзæн сæрдыгон æнтæф бонты.
Ныртæккæ куыстуаты разамынд архайы трамвайтæн бацæттæ кæнын, сæрмагонд æркаст сæм кæм цæудзæн, ахæм бынат дæр.
Хæстæгдæр рæстæг ног трамвайтæ рацæудзысты горæты уынгтæм. Уымæй уæлдай ма республикæ фидæны аз райсдзæн 25 ног травмайы. Уый та ууыл дзурæг у, æмæ горæты рагондæр ӕмӕ уарзондæр транспортон фæрæзæй цæрджытæ пайда кӕй кæндзысты æхсызгондӕрӕй.
