«Недетские игры». Ахæм сæргондимæ киноныв исынц Цæгат Ирыстоны. Ныхас дзы цæуы æртæ чызджы хъысмæтыл. Сфæнд кодтой музыкалон къорд саразын. Сериалмæ кæсджытæ фендзысты æрыгон артисткæты аивадон фæндаг. Æвдисæн уыдзысты сæ æнтыстытæ æмæ зындзинæдтæн. Бæлвырддæр информаци нырма хъуыстгонд нæу. Бæрæг у æрмæст, 10 серийæ арæзт кæй у киноныв, уый. Сфæлдыстадон фæзуат бабæрæг кодтой ме ‘мкусджытæ.
Рагон традици. Сфæлдыстадон къорды уæнгтæ иууылдæр тæбæгъыл сæ къух æрфыссынц. Дарддæр æй режиссёр видеокамерæйы штативыл асæтты. Кæд лыстæг ныппырх уа, уæд киноныв адæмы зæрдæмæ фæцæудзæн. Тæбæгъæй цы къæрттытæ баззайы, уыдон артисттæ æрæмбырд кæнынц — цæмæй ацы куыст сæ зæрдыл дарой.
Ног проектыл куст нырма йæ райдианы ис. Алцыдæр — нысангонд фæтк æмæ сценаримæ гæсгæ. Сериал «Недетские игры» цаутæй хъæздыг у. Æвдыст дзы цæуы скъолайы дуг. Бæлвырддæр информаци та киноныв аразджытæ нæма хъæр кæнынц.
Сериалыл кусынц 20 адæймагæй фылдæр. Фæсивæдæн сæ фылдæр фæнд кæнынц сæ цард актёры дæсныйадимæ сбæттын. Ацы куысты фæрцы фæлтæрддзинад райсдзысты.
Кинонывы режиссёр Илья Братчик шоу-бизнесы 25 азæй фылдæр ис. У бирæ зарджыты автор. Кусгæ дæр сыл бакæны йæхи студийы. Куыд зæгъы, афтæмæй йæм ахæм киноныв сисыны хъуыды æртæ азы размæ фæзынд. Уæд æм æртæ чызджы æрбацыдысты йæ студимæ. Ныффыста сын зарджытæ. Дарддæр сфæнд кодтой видео-форматмæ рахизын. Проект райрæзт æмæ дзы ныридæгæн архайы 40 сывæллонæй фылдæр. Фидæны артистты ахуыр кæнынц биноныгæй.
Сфæлдыстадон къорд ныридæгæн цалдæр проекты рауагъта. Се ‘хсæн куыд сериалтæ, афтæ цыбыр кинонывтæ æмæ музыкалон клиптæ дæр. Ныр дæр кусынц алыхуызон жанрты.
Куыстытæ фенæн ис «YOUTUBE»-ы. Ис дз, ныртæккæ кæй исынц, уыцы проекттæ. Уæдæ фидæнмæ фæндтæ дæр сты егъау.
